BÊRÎTAN SARYA / ANF / RIMELAN
Heta nika xeylê reyan ameyo dîyayene ke Tirkîya bi hawayo aşkere piştî dana DAÎŞî û no het de xeylê dîmen, belge û fotografî vejîyabi werte. Goreyê qiseykerdişê çeteyê DAÎŞî Îslam Mûmammed Balûşa bi nameyê qodî Talha El Cazzevîyî yo ke destê QSDyî de yo, nê piştîdayîşê Tirkîya dewam kenî.
Balûşa yo ke 2014 de tewrê DAÎŞî bîyo, bi vîzê şono Tirkîya û ûca de hetê çeteyan ra yeno pêşwazîkerdene. Balûşa dîyar keno ke gama ke o bi embazêkê xo resayî Riha, ewja de di polîsan pasaportê înan kontrol kerdî û vato ‘Nika şêrê tewrê DAÎŞêî bibê’.
Balûşayî da zanayene ke bi edamanê bînan merkezê Riha de ameyî têhet û ewja ra ravêrtî Sûrîye. Balûşa ewil şono Kobanê, dima ra ewja ra derbasê Reqqa beno û yewîya Mûsab Zekavî de perwerde vîneno. Dima ra verê xo dano Ezazî û ewja de birîndar beno û yeno berdene bi Bab û dima ra zî seba tedawî erşawîyeno Tirkîya. Balûşa Cerablûsî ser ro 2016 de şono Dîlok wextêk ewja de maneno û dima ra şono Stenbol. Aksaray de nêweşxaneyêko taybet de yeno tedawîkerdene. Balûşa nameyê nêweşxaneyî nêzano la vano cayêko zaf merkezî bi û nêzdîya ci de Asayîşê Fatîhî estbi.
Seba ke asan têbigêro, belge dîyeno ci
Goreyê Balûşayî nêweşxane de her çî rêxistinkerde bi. Tena çeteyê DAÎŞî çînêbî, sivîlan zî tedawî dîyêne. DAÎŞijî bi erdîş û kincanê xo û bi her halê xo bewlî bîy. Merdim vano qey, doktor û hemşîreyan zanayêne. Mumkun nîyo ke dewlete naye mezano. Balûşa tedawî ra dima nêzdîye nêweşxaneyî de keyeyêkê DAÎŞî de maneno. Keye ra peya şino nêweşxane û yeno. Balûşa rayêk hetê polîsan ra yeno girewtene û çend saete ra dima reyna yeno veradayene û belgeyêk dîyeno ci ke asan tê bigêro.