Çewlîg de AKP hata nika 3 mebusî vetenê. Hen zona ke no hal endî niya maneno, Çewlîg beno baxçê AKP.
Weçînîtîso peyen de BDP Çewlîg ra jû mebus vet. Na seweta AKP tarvade girane biye. AKP hata ewro na mesela qebul nêkerda. Coka dêkûdolavan dima ra, wazena Çewlîg de miletê ma biyaro têverver. AKP hata 2011 vatenê “mi Çewlîg ra 3 mebusî vetê” xo goynenê, weçînîtîsê 2011 de tarve gurete, dirvêtya xo xorî ya.
Derdê AKP na wo, coka nika serokê belediya, Valî û mudirê asayîşî seweta AKP kewtê dewrê. Tabî Erdogan 2011 de teyna Çewlîg de vînd nêkerd. Qisaweta xo nika biya jede.
Dewleta AKP onca miletê ma bi destê miletê ma dana qirkerdene. Çike endî bi xo nêşîkîna verva hereketê serbestiye tewa bikero. Tarîxê miletê ma de her tim niya bî.
Dewlete ke kewte tenge, hemkarkeranê xo ana kar. Eke biye teqetin, hemkarkeranê xo zî darde kena, kisena.
Hereketê Seyîd Rizay de niya bî, hereketê Şex Seîd de niya bî, nika zî hen yo. En numuno zelal na derheq de Hesen Xeyrî yo. Dewleta tirk verecoy Hesen Xeyrî meclîsa tirk de kerd mebus, dima kist.
Fênda qorucu zî niya bena. Fênda hemkarkernê dewleta tirk zî niya bena. Dewlete rind zonena ke yê kam ke qomê xorê xêrê xo çîno, dewleta tirk rê qe nêbeno.
2ıê asma îlonê, yeno peyen Çewlîg de verva bonê BDP jû serestîs virajiya. Asayîsan de zelal aseno ke, teqetê ke erzenê bonê BDP ser rind organîzê biyê û hetê polîsanê AKP ra rind yenê seveknayene.
Eke Tirkiye de caye 2 mordemî ameyî têlewe û slogan est, polîsî dormê ci cenê, desinde bi cop û çekan danê piro. Çewlîg de polîs tiyatro kaykeno, hebe qaz erzeno, zovîna mordemanê xo sevekneno.
Hama mordemoke wazeno tabela BDP rono, dêsro bazgur dano, polîs eyrê tewa nêkenê.
Dima polîs bi xo kuno bonê BDP, pankartanê BDP çerkeno, pencere ra cer faşîstanê xo paçkeno, dest sanen ra, paçkeno vano “çiyoke sima wastenê bikerê, mikerd, endî şerê.
Dima Facebook de tayê hemkarkerê AKP na garana faşîste rê wayîr vejayî. Gorê nî hemkarkeranê AKP, na garane ‘Zaza’ biya, sewet ‘heqanê Zazayan’ verva BDP no serestîs virasto!
Çi xerîb? Mordemekan dest de desmala tirkî, erzenê BDP ser, taye ‘Zazayî’ nî nijadpersetanê tirk û polîsê tirk rê wayîr vejînê. Peh, peh çi ‘Zazayî’ yê!!
*****
Endî beso! Nika tam waxt o: Sazî, dezge û rêxistinê ma gune endî tirkî weşiya xora vezê. Rojnamê ma gune pelganê tirkî kêmkerê, televziyonê ma programanê tirkî kêmkerê, siyasetvanê ma eskerakerdîsan bi zonanê kurdistanî bide.