30 serreyê xo de Çîçek dest pê muzîkê kerd. Çîçek bi nameyê ‘Hêz’ de albumek newe vet, goreya Çîçekî nameyê albumê ci têkoşîn û xoverodayişê malbatê ci ra yeno û dema viraştişê albumê zî têkoşîna malbatê xo ra îlham girewto. 


Şerê heme şaran: Kobanê

Zereyê albuma Hêz de 10 deyîrê est î. Taybetê na albumê de ver deyîrê Kobanê vejîyeno, çimkî Çîçek û embazê ci deyra Çanakkaleyê seba têkoşîn û xoverodayişê Kobanê newe ra dîzayn kerdî, goreya Çîçekî Şerê Çanakkaleyê, dinyayê de tewr gird şereke hîsgêrî yo, no ser zî qet yew dorûver nêeşkeno bivajo ke no şerî ez qezenc kerda û Şerê Çanakkaleyê bi têkoşîna heme şaran, rengan ameyo qezenckerdişî, no ser zî ganî bike seba Kobanê zî ona yew deyr biameynê nuştişî.

Çîçek wina vat: “Kobanê de bi destê çeteyê DAIŞî sûcê merdimatîyê ame şuxulnayişî, şarê kurd hetê heme dewletê kapîtalistî de tena amey veradayişî û ma eşkenê bi aşkera bivajî ke şarê kurd, destê çeteyê DAIŞî de mehkûmê mergî ra amey kerdişî. Ma tay dorûveran ra mesajdayiş rê deyra Çanakkaleyê, seba Kobanêyê newe ra dîzayn kerdî.”


Soz û muzîk min ra aîd î

Çîçek bal ant ser deyra xo ya Colemêrgî û wina dewam kerd: “Ma seba xo tepa antişê PKKê deyra Colemêrgî nuşt. Seba hîsê eşq û heskerdişî zî deyrê ma, na albumê de est î. Ez seba maya xo deyra Ez û Te Ma nuşta û na deyr zî albumê de ca gêna. Ma klîba deyra Ez û Te Ma zî antî, na deyrê de ez behsê maya xo, hesreta xo û tenayê xo kena. Xebatê albumê weş vîyart û album elaqayeke gird vîna.”

Çîçek ciresna ke albumê de 10 deyra 5’ê ci ra aîd î û soz û muzikê nê 5 deyrê zî o viraşto û wina vat: “5 deyr zî aîdî Îbrahîm Candan î, taybetê keda Candanî zaf albumî ra vîyarto. Heme dîzayna albumê hete Zîz Muzîk ra ame viraştiş û navenda Zîz Muzîk zî Amedî de yo. Na album heme barbîyîşê hîsê min î, çimkî min domantê xo ra nika her tim qehr û zehmetî anta û taybetê maya xo ra zaf hesret menda.”


Malbatê şehîdan

Çîçek destnîşan kerd ke xizmetkerdişî muzîk rê sewbî planê ci est î, demo ameyoxê de ê plan kenî ke do komek saz bikerî û na komê de zî tewr kêm 5 hunermendê ca bigêrî, hewna tena yew deyr ra singel û klîban biancî, programê televîzyonê do bivirazî. 

Çîçek îzeh kerd ke na album teqyayişê hîsê ci yê, çimkî birayê ci, pîyê ci, datê ci û sewbî merdimanê ci hetê dewleta tirk amey qetilkerdişî û na album zî berhema têkoşîna şehîdan o, çimkî merdim dema ke hîsgêr bibo se no demî ya dest pê nuştişê deyrî keno ya zî hilberîna muzîkî keno, bena merdim wazeno bi teqno ya zî parçe bikero la ê qet hetanê nika nêwaştî biteqnê ya zî parçe bikerî û ê her tim waştê xebatê aştîyî û xulqkerî bikerî û o heme dorûveran de bi aşkera vato ke na albumê de rolê Dayikê Şemî zî est î, ê zatî demo ameyoxê de çi xebat bikerî se do heme nê xebatê xo seba Dayikê Şemîyî û faîlê meçhulan bikerî û seba înan zî taybetê projeyê gird bivirazî û seba no zî ganîyo ke çapemenîyê înan ra hetkarî bido.


NAVENDA XEBERAN