Rastika Bêrîtane (Gulnaz Karataşe) kam bîye? Gelo tena seke yeno vatiş, wexto ke guleyê aye qedîyenî, seba ke teslîm nêba vera îxanetê hêzê kurdê hemkaran ke dewleta tirkî reyde ortaxî viraştbî de vindete? Tena no bî nêke doza ke tira bawer kerdbî û cayo ke bi hawayo îdeolojîk û fikrî de mîyan de ca girewtêne reyde eleqeyê xo estbî? Gelo do bişînayêne hêz û îradeyê derbazkerdişê astengîyê ke vernîya utopyaya aye de estbî, nîşan bidayêne. Gelo seba nê hîna wextê şerkerdişî nêamebî? Gelo bedelê pratîzkerdişê vatişê ‘yê ke şer keno azade beno, yê ke azade beno rinde beno, yê ke rinde beno zî yeno heskerdiş’ zaf kede, hewldayîş û bedel waştêne? O wext gelo hîna wextê kewtişê rayîrî û resayîşê cayo lazimî bide esta, nêamebî?
Bêrîtane zerrîyêka muhakemegêre, gêrayoxêka manaya kûre û serewedarkarêka girde ke no oxir de canê xo dayêne, bîye. Bêrîtane şexsîyeteko ke ver bi gêrayîşê azadî şîyêne û heme estena xo no oxir de feda kerdêne, bîye. Bêrîtane cinîyêka heskerdişê xo ser serewedarkarîya xo de zêde kerdbî. Bêrîtane cigêrayoxêka kûre bîye û ferq kerdbî ke bê serewedaritiş cuye bêreng, bêruh û rutin manena. Bêrîtane zanayêne ke rindîye kede, têkoşîn û awankerdişê ferqî ya û aye xoverdakara ke cuya erzane qebul nêkerdêne.
Têkoşînê embaza Berîtane zaf derg nêbî, labelê reyna zî mîrasêko gird û tarîxî pey xo de verdaye û tesîrêko gird mezgê ma de viraşte. Bêrîtane bîyê rayberêka winasî ke xeta xoverdakarî û şorişgêrîya kesê ke aşiqê azadî û demokrasî yî de şopêko gird verdaye. Yanî Bêrîtane tena bi vindetişê xo yo vera îxanetî de nê, eynî wextî de şorişgêrêka vera zîhnîyeto şaş û tarzê teberê rêxistine de tavîz nêdayêne û heta peynî têkoşîn dayêne, bîye. Zîhnîyetê camêrdî ke waştêne rexne, redkerdiş û serewedarkarîya cinîye orte ra wedarno de têkoşînêko gird dayêne û înan ser de tersêko gird awan kerdbî. Bêrîtane tena vera nê camêrdî de nê, vera cinîya ke hetê camêrdo hakim de ca gêna de zî bêteredut û bêtavîz têkoşîn dayêne. Heto bîn ra Bêrîtane vera îttîfaqê zîhîyetê camêrdî yê hakim û cinîya hemkare de bi hawayo qerardar vindetêne û no het de wayîrê fikrêko kûr bîye. Tena vera îxanetê neteweyî de nê, îxaneto ke vera heqîqeta cinîye rê ters bî de zî tavîz nêdayêne û wayîrê vindetiş û têkoşînêko gird bîye.
Şehadetê aye ra 25 serrî dima, seba ke Bêrîtane vera îxanetî de bi hawayo bêtavîz vindetbî û cuyêka azade tercîh kerdbî, ma ewro hewl danî bi hawayo kûr aye fam bikerî û yad bikerî. Ganî hêzê xoverdayîşêkê girdî manaya kûre ya heqîqete de bêro gêrayîş. Çimkî 25 serrî ra dima îxaneto ke bîbî sebeb ke embaza ma Bêrîtane xo zinaran ra bierzo war, ma ewro îxaneto ke ê îxanetî ra girdêr o û hîna zaf dano vînîkerdiş cuyenî. Dîyar beno ke tayê hêzî hîna îxanetî ra qaso ke yeno waştiş, dersî nêgirewtî. Yewna rey ame famkerdiş ke tarzê têkoşîn û xoverdayîşî yê na gêrayoxa heqîqete wayîrê îdeolojîyêko tarîxî yo.
Ganî merdim sîyaseto ke serra 92î de embaza Bêrîtane vera ci de vindete bi hawayo raşt û kûr muhakeme bikero, hesabê ci pers bikero û derbaz bikero. Eke nêro derbazkerdiş, o wext seke Başûrê Kurdistanî de ame dibarekerdiş, kurdî do cuyayîşê dejanê winasîyan bidomnî. No zî do bibo sebeb ke şarê ma seke ewro zî cuyeno, do hetê leşkerî, sîyasî, psîkolojî û hîsî de netîceyê giranan reyde têrî bimano. Helqaya ke vînî kena û sey ewroyî dana vînîkerdiş, ganî aye helqa bêra zelalkerdiş. Çîyo ke ganî ser o bêro vindetiş no yo.
Hertim yeno vatiş ke Tevgerê Azadîya Kurd bi hawayo zaf îdeolojîk averşîyayîşan ra ewnîyeno. Tayê kesî derheqê rewşa peyêne ya Başûrê Kurdistanî de zî çîyanê winasî vatî. Ya, problemo ke esto, xora problemêko îdeolojîk o û bingeyê hêriş û dagîrkerîya Başûrê Kurdistanî de sebebê îdeolojîkî estî. Ewro problemo tewr gird û handîkabê partîyê sîyasî yê kurdan yê Başûrî zî ferqnêkerdişê nê yo. Ewro partîyê sîyasî yê kurdî yê Başûrî bi hawayo îdeolojîk probleman ra nêewnîyenî, ma zî netîceyê ci cuyenî. Çi çiqas îdeolojîk o û ganî merdim kura ra biewnîyo, çîyê ke ameyî cuyayîş do senî vernîya înan biameyêne girewtiş, nê persê muhîm î. Çîyê ke ma wazenî cewabê ci peyda bikerî no yo; heriş çiqas gird beno wa bibo, serwerîya hêz û teknîkî çiqas zaf benî wa bibî, ganî merdim babetê têkoşînêko senîn, xoverdayîş û îttîfaqî ser o bivindero.
Xoverdakarîya Bêrîtane, bingeyê xo cuye, îttîfaq, polîtîk, felsefîk û îdeolojîyê PKKyî ra gêna. Ganî merdim na şexsîyêta ke têkoşîn dana, xover dana û sere nêronena, heqîqeta PKKyî de bigêro. Bêrîtane zî ruhê azade û sîmgeya tewr xoverdakare, tewr sade û kûre ya.