Cinîya bi nameyê Comandante Ramona ke têkoşînê gerîlayanê EZLNyî de têkoşîn daye, bi vatişê ‘Ma seba ke dinya bibedilnî tîya de kom nêbî, pêşnîyazêkê ma esto; ma wazenî dinyayêka newe xelq bikerî’ yena şinasnayene’ yena şinasnayene.
Goreyê xebera keyepelê Gazete Karinca, Ramona êla çermsûran de yena dinya û rotişê çîyanê hunerê destan reyde debara xo kena. Ramona vera neheqîye, xespê kede û feqîrîye de beşdarê têkoşînê Artêşa Rizgarîya Neteweyî ya Zapatîstayan (EZLN) bena. Ramona o wext qerardarîya xo bi vatişanê ‘Ez bawer kena ke mergo bi têkoşîn dayene, mergo ke vêşanîye ver beno ra rindêr o’ nîşan dana.
Ramona netîceyê têkoşîn û keda xo de bena 7 fermandaranê cinîyan yê EZLNyî ra yewe û tewr vernî de têkoşîn dana. Ramona seba ke hetkarîye bida awanbîyayîşê Kongreya Cayîya Neteweyî şona Mexîco Cîty. Cinîyî o wext kongre de bi vatişê ‘Ma heme Ramona yî’ yenî aye vera. Ramona eynî wext de cinîyan rê zî rayberîye kena. Ramona wexto ke 1996 de wendekaran rê mesajêk erşawena, mesajê xo de wina vana: “Ma zanî ma do senî xover bidî, ma do destûr nêdî nînan.”
Bawerî, hêvî û têkoşînê aye mîras mendî
Ramona 6ê çileye 2006î de Meksîka de wefat kena. Rayberê Zapatîstayan Subcommandante Marcos Ramona ser şinaseyê ‘Zerrîya Zapatîstayan’ keno û wina vano: “Dinya cinîyanê xo yê esasîyan ra yewe vînî kerde. Meksîka zî cinîyanê xo yê şerwanan ra yewe vînî kerde. Ma zî parçeyêkê zerrîya xo vînî kerde. Ramona ra dima bawerî, hêvî û têkoşînê aye heme cinîyan rê mîras mendî.
AMED