MUJDAT CAN / DÎHABER/DÊRSIM
Şarê Dêrsimî her ca de bi nasnameyê xo yê muxalîfî yenê şinasnayîş. Şarê Dêrsimî derbeya 12ê êlule ra dima daxî vera Bedilnayîşê Qanûno Bingeyî û sîstemê yew kesî de vindetbî. Babete ser o cinîyê dêrsimîjî qisey kerdî û referandûm de do seba çi vajî nê, ardî ziwan.Cinîya bi nameyê Nezîye Oksuza ke taxa Munzurî de cuyena, wina va: “Seba ke biratî bibo û ciwan nêrî qetilkerdiş, ma vanê nê. Ganî ma rayîrê ziwanê xo de şêrî û fek kulturê xo ra veranêdî. Êdî bes o. Ma vanê nê.”
Ganî ma bi xo bikerî
Cinîya bi nameyê Beser Coşkune qisey kerd û wina va: “Cinîyê Dêrsimî referandûm de vanê nê. Vînayîşê ma wina yo û her kes zî wina fikiryeno.”Cinîyan ra Emoş Kutane zî va ‘cinîyê dêrsimijî vanê nê’ û wina domnaye: “Şarê Dêrsimî bêkar û feqîr î. Wextê Erdoganî de feqîr hîna zaf feqîr bîyo û zengîn zî tayîna zengîn bîyo. Torbeyêk ard bîyo 85 TL. Verê cû ma debara xo bi heywankarî kerdêne, labelê nika dewî zî ameyî vengkerdiş û ti kes dewan de nêmendo. Ganî ma vera neheqîyan de hêzê xo bikerî yewe û bi hawayo hîna qewetin no referandûm de vajî nê.”
Wa cinîyî vajî nê
Cinîyan ra Elîf Yildirime qala îxraçkerdişan kerde û qiseykerdişê xo de wina va: “Ganî ma ser sindoqan de îxraçkerdişan bîyarî çimanê xo ver. Mamosta, kedkar û kesê muxalîfî ameyî îxraçkerdiş. Kesê ke ma nêwazenî, ma zî înan nêwazenî. Cok ra ma do sindoqan de vajî nê.”Cinîya bi nameyê Gîzem Yamaçe zî qiseykerdişê xo de bale ante sîstema yew kesî ser û wina va: “Hukmatê AKPyî bin kontrolê Erdoganî de yo. Ma bîyî şahidê her tewir neheqî û cînayetan. Eke ma nêwazenî raştê qirkerdiş û qetlîyaman bêrî û eke ma nêwazenî qanûnê tecawuzî newe ra bêrî meclîs, ma do qebul nêkerî. Ez vera nê heme neheqîyan de vana nê. Cok ra ez veng dana heme cinîyan ke wa neheqîyan qebul nêkerî û vajî nê.”