Rewşa OHALî de 331 karkerê Sendîkaya Kedkaranê Bûroyî (BES) bi Qerarnameyê Hukmê Qanûnî (KHK) ameybî îxrackerdiş. 331 karkeran ra 69 kesî cinî yî.
Babet ser o endama BESî Fatma Bora Koçaşe ke Daîreya Bacî ya Segmenî ya Anqara de xebetîyena, karkera ÎŞKURî Nuray Kahramana ke 2008 ra nata xebetîyena û Dîlan Yakuta ke serranê 1990 ra nata xebetîyena, qisey kerdî.
‘Ma do berz bikerî’
Koçaşa ke bi qerarê hûmara 672. yê KHKyî 22ê teşrîna peyêne de ameybî îxrackerdiş, wina va: “Tirkîya wazena vengê muxalîfan bibirna. Vera înan de têkoşînê kedkar û karkeran zaf muhîm o. Sendîkaya ma de polîtîka û têkoşînê cinîyan berz bîbî. Ma cînîyî do pîya têkoşîn bidî û vera îxrackerdişan de têkoşînê xo berz bikerî. Îqtîdar komeleyê cinîyan bi zorî destê înan ra gêna û wazena ke cinîyî têk şêrî.”
‘Ti cinî ya, ronişe’
Nuray Kahramane zî qiseykerdişê xo de bale ante polîtîkayanê dewlete ser û wina va: “Îqtîdar bi serran o ke mesajê ‘ti cinî ya, keyeyê xo de ronişe, domanan pîl bike, mêrdeyê xo ra baş biewne û ci rê baş hizmet bike’ dano cinîyan. Îqtîdar bi îxrackedişan mesajê xo da ma zî. Labelê ma keye de nêronişenî û ma do têkoşînê xo bidomnî. Ma nasname û ziwanê xo ver gure ra yenî eştiş. Dewlete, îxrackerdişê ma ra dima kesê ke sey înan fikirîyeno, gêno gure. Vera înan de tena yew çî esto; o zî dayîşê têkoşînî yo.”
Kesk bena hedef
Dilan Yakute zî va ‘embazê ma gure ra yenê giretiş û yenê tewfîqkerdiş’ û qiseykerdişê xo wina domnaye: “Îqtîdar KESKî hedef gêno. Ma înan ver de çok nêronenî û têkoşînê xo domnenî. Cinîyî do vengê xo biresnî heme cayan. Nika rewşa îstîsnayî yena meşnayîş. Labelê na rewşe zî do bivîyara. Heta ke rewş baş nêbo ma do têkoşînê xo rê dewam bikerî.”
ANQARA / DÎHABER