Bi nameyê Sabîha Gunduze de cinîya ke qezaya Sûrî ya Amedî de cuyena, Amedî ra zaf hes kena û heta nika xeylê şîîrî nuştî. Gunduze bi taybetî rijnayîşê Amedî ser o şîîrî nuştî û şîîranê xo de qala wextanê verênan yê Amedî kena. Gunduze şîîranê xo de qala dej û problemê taxanê Sûrî kerdî û bale anto dişmenîya dewlete ya vera cayanê tarîxîyan de ser.
Gunduze şîîranê xo de wextê verênan yê Amedî ser o vindena û werreknayanê xo ana ziwan. Gunduze rijîyayîşê taxanê sûrî ra zafane taxanê Alîpaşa, Benûsen, Lalebey û sewbîna girewtî şîîranê xo û vera rijîyayîşê Sûrî de hêrs û reaksîyon zî nîşan dana.
Gunduze tena şîîran nênusena, eynî wextî de kel-melanê kehenan arê dana. Gunduze kel-melanê kehenan ra bangêre, tepsî, saete, kîlîme, tas û sewbîna çîyê sifirî, lambaya gazyaxî, sitil, kerrayê bazaltî û sewbîna çîyê ke cewherê nê cayanê tarîxkîyan de estî arê dayî. Gunduze keyeyê xo açarnayo muzeyêko şenik û berê keyeyî hertim akerde yo. Kam ke biwazo eşkeno şêro bivîno.
Qet nêwazena Sûr ra vejîya
Gunduze dîyar kena ke cuya verêne nê taxan de nêmenda, cok ra aye nê kel-melan arê dana. Gunduze dana zanayene ke aye wazena bi nê çîyan cuya verêne bi neslê neweyî bida famkerdene ke cuya verêne vînî nêbo. Gunduze ana ziwan ke aye qet nêwazena ke Sûr ra vejîya.
AMED