Futbolo ke sey sporê camêrdan yeno zanayîş, bi têkoşînê hetgiranê cinîyan bedilîyeno. Amed û Dêrsim ra dima nika zî Hopaspor bi cîyayîya xo ame rojeve. Bi nameyê ‘Cinîyê Serewedarkarî yê Behro Sîya’ yew grûba hetgiran ameya awankerdiş û mîyanê ci de cinî, camêrd, ciwan, extîyar her hetî ra kes ca gêno.
Babete ser o hetgira cinîye Melîke Arduçe qisey kerde û wina va: “Ma trîbunan de hem piştî danî taximanê xo û hem zî vera zayendperestîye de têkoşîn danî. Ma siloganê ke şîddet û cîyayîyan mîyanê xo de bihewênî, nêerzenî û no het de baldar têgêrenî. Ez veng dana heme cinîyan, wa têkoşîn û piştîdayîşê xo trîbunan de gird bikerî.”
ARTVÎN