Siba şar şono sindoqan ser û hetê xo dîyar keno. Roja referandûmî tewr zêde pawitişê sindoqan muhîm o. Cinîyê HDP û CHPyî seba pawitişê referandûmî amade yî û veng dayî heme cinîyan ke wa roja referandûmî de sindoqan bipawî.
Wezîfedara sindoqê HDPyî Selma Metîne qiseykerdişê xo de dîyar kerde ke do cinîyî rengê sindoqan dîyar bikerî û wina va: “Ma do seba ameyoxa doman û cinîyan şêrî sindoqan ser û vajî nê. Nêşîyayîşê sindoqan ser yeno manaya derbe. Kesê ke bîyî wezîfedarê sindoqan yenê tewqîfkerdiş, derbe dîyena demokrasî ro. Cinîyê ciwanî dildarê pawitişê sindoqan î. Seba ke Tirkîya de demokrasî çin a, kay û hîle kewenî dewre. Cinîyî eşkenî vera hêrişan de bivinderî û hêrişan biqedênî. Cinîyê dildarî heta ke reyî nêrî hûmartiş wa sindoqan terk nêkerî.”
Cinî dê dîyar bikerî
Endama MYKyî ya CHPyî Îlknur Savciye zî wina va: “16ê Nîsane de do cinîyî rengê sindoqan dîyar bikerî. Tena Amed de 760 sindoqî estî, la wezîfedarê cinîyî tena 487 kesî. Ez cinîyan ra bawer a. Nê bedilnayîşan de ti heqê cinîyan çin o. Cinîyî ferqê neheqîyan de yî. Ma xebatanê xo ra zanê ke cinîyî do rengê sindoqan dîyar bikerî. Wa cinîyî reyê xo bixebitnî û wayîrê sindoqan bivejyî. Ma seba referandûmî amade yî.”
AMED