ZULAL KOÇER/STENBOL
Nevîn Yildirime 28ê Tebaxa 2012î de wexto ke Nurettîn Gîderî waştbî tecawizê aye bikerî, çarçewaya xo pawitişî de Gîderî kiştbîye. Netîceyê doza ke 2 serrî dewam kerde de cezaya muebbedî dîyaybî Yildirime.
Avûkatanê femînîstan muracatê Yargitayî kerdbî û roniştişê doza temyîzî do ewro bêra dîyayîş. Cinîyan seba beşdarbîyayîşê doze veng dayî.
Cinîyan ra Edîtora Kovara Ekmek Ve Gulî Sevda Karacaye va ‘roja ke hedîse ame eşnawitiş, ma zana ke Nevîne heqdar a’ û wina dewam kerde: “Tewr zaf cinîyan heq da Nevîne. Seba ke Nevîne zaf çî cuyaybî, mehkeme de bêveng mendbîye. Ma edalet wazenî û ma do seba Nevîne waştişê edaletî ra fek veranêdî.”
Ganî ma wayîrê na doze bivejyî
Koordînasyonê Cinîyan yê HDPyî ra Bîrsen Kayaye zî dîyar kerde ke cinîyê ke heqê xo yê pawitişî bikar anî, cinîyê sembolî yî û daye zanayîş ke ê do beşdarê doza Nevîne bibî.
Meclîsê Cinîyan yê HDPyî ra Nadîye Gurbuze zî wina va: “Nevîne seba ke bicuyo, kişte. Ganî qerarêko winasî bivejîyo. Piştîdayîşêyewbînan yê cinîyan muhîm o. Ma do hetê Nevîne de ca bigîrî.”
Aktîvîsta Heqê Cinîyan Yasemîn Bektaşe zî va ‘Çira mecbûr mende û kişt? Ganî no bi hawayo baş bêro dîyayîş’ û wina domnaye: “Lazim o herkes wayîrê na doze bivejîyo. Se ra 50ê komelî cinî yî, labelê ganî se ra 50o bîn zî wayîr bivejîyo.”