MÎNA ROJ
ANF / STENBOL
17ê Kanûna 1999î de Milletê Yewbîyayeyî 25ê Teşrîna peyêne sey Roja Paştîdayîş û Têkoşînê Mîyanneteweyîye ya Vera Şidetê Serê Cinîyan îlan kerd. Cinîyanê rojnamegeran ard ziwan ke ê 25ê Teşrîna peyêne de do bivejîyê kuçeyan.
Mûxabîra rojnameyê Evrenselî Eylem Nazliere viste vîrî ke huqûqê Tirkîya tim ceza dano cinîyan û camêrdî zî naye ra paştî gênî û wina va: “AKP cinîyan rê dişmenîye keno. Her roj tewr tay 3 cinîyî yenî qetilkerdene. Medyaya hemkare zî xeberanê qetilkerdişî seke ke cinîyan no heq kerdo wina dana û şidetê camêrdî meşrû kena. Ma sey rojnamegerî hem nasnameyê cinîye ra hem zî rojnamegerîye ra ancenî la ê se kenî wa bikerî ma têkoşînê xo rê dewam kenî.”
Mûxabîra Jinnewsî Rojda Aydine zî arde ziwan ke tewr zêde cinîyê rojnamegerî raştê şidetî yenî û wina domna: ‘‘Seba ke rojnamegerê cinîyî xeberanê tacîz û tecawuzî ser o hîna zaf vindenî, camêrdê kerdoxî hêrişê ma kenî la ma cinîyî heta ewro nêvindertî û do mevindere. Ça û çi wext beno wa bibo ma do vengê cinîyan bidê eşnawitene.”
Ma têkoşînê xo domnenî
Eda Narîne ke vera şidetî de bêveng nêvindert û Dokuz8 Haberî ra îstîfa kerde, wina va: “Ma do seba ke vengê embazanê xo yê rojnamegeranê cinîyan rê bibê veng û seba vatişê ‘Ma yewna kes do kêm mebê‘ 25ê teşrîna peyêne de Taksîm de yê.” Ekmek û Gul ra Elîf Ekîn Saltike zî ard ziwan ke emser Kurdîstan û Tirkîya de cinîyî şartanê zehmetan de kewenî 25ê Teşrîna peyêne û wina domnaye: “Bi ameyîşê krîzî neçarîye zafêr bî û no zî şidetê serê cinîyan hîna zaf kerd. Ma do rixmê heme şîdet û zextan bivejîyê meydanan û têkoşîn rê dewam bikerê.”