TJK-Eye bi wesîleya serrgêra Qetlîyamê Şengalî de îzehetêko nuştekî daye. TJK-Eye îzehetê xo de veng dayo heme demokrat û şorişgêran û wina vato: “Seba ke roja 3ê Tebaxe bibo Vera Qetilbîyayîşê Cinîyan û Qirkerdişî de Roja Çalakîya Mîyanneteweyî, 3ê Tebaxe de çar hetê dinya de çalakîyî bêrî viraştene. Wa herkes piştî bido çalakîyan.” 3ê tebaxa 2014î de çeteyê DAIŞî hêrişê Şengalî kerdbî û netîceyê hêrişî de bi hezaran êzidîyî ameybî qetil kerdene û bi deshezaran êzidîyî mecbûr mendbî koç bikerî. Reyna bi hezaran cinî û domanî hetê çeteyan ra ameybî remnayene. Ewro serrgêra 4. ya Qetlîyamê Şengalî yo. Tevgerê Cinîyanê Kurdê Ewropa (TJK-E) serrgêra hêrişê qirkerdişî yê Şengalî de do çar hetê dinya de çalakîyan organîze bikero. Çalakîyî do bi rayberîya tevgerê cinîyan de û bi siloganê ‘Azadîya cinîyanê Şengalî, azadîya merdimîye ya’ bêrî viraştene. Eynî roje do seba vîrardişê kesê ke ameyî qetil kerdene, deqayêk rêz bêro girewtene. Babete ser o TJK-Eye îzehetêko nuştekî daye. TJK-Eye îzehetê xo de dîyar kerdo ke 3ê Tebaxa 2014î de çimê heme dinya ver de êzidîyî raştê hêrişê çeteyan ameyî û wina domnayo: “Êzidîyî qetlîyamêko gird reyde têrî mendî. Armancê hêrişan o bi ke bawerîya êzidîtîye ser rîyêr erdî ra pak bikerî. Cok ra bi hawayo sîstematîk vera xo dayî cinîyanê êzidîyan. Çeteyan nizdîyê 3 hezar cinî û domanî qetil kerdî. Bi des hezaran merdimî mecbûr mendî ke koçê sewbîna cayan bikerî. Tayê ci serê koyan de vêşan û têşanîye ver merdî. Cinî û domanan ra 5 hezarê ci raştê tecawizî ameyî û bazaran de ameyî rotene. Nika aqûbetê tayînan nîno zanayene.” Xoserîya demokratîke ameye îlan kerdene TJK-Eye dewamê îzehetê xo de wina vato: “No hêriş ke hetê Milletê Yewbîyayeyî ra sey qetlîyamî ame şinase kerdene, tarîxê êzidîyan de fermanê 74. bi. No ferman zî sey fermananê bînan bi hawayo gonîyin derbaz bi. Nê felaketê girdî ra dima qetlîyam, koç û sewbîna çîyî mendî. Qetlîyam ra dima ame fam kerdene ke xopawitişê êzidî û bawerîya êzidîtîye çiqas muhîm û nêbo nêbeno yo. Xora dima ra Şengal de xoserîya demokratîke ameye îlan kerdene.” Qetilbîyayîşê cinîyan bêceza maneno TJK-Eye îzehetê xo de bale ante ser dinya de qetilbîyayîşê cinîyan ser û wina dewam kerdo: “Ewro hîna zî qetilbîyayîşê cinîyan dinya de tehlukeyêko gird o. Heme cayê dinya de tena cinîyî zayendê xo ver raştê hêrişêkê sîstematîkî yena û yenî qetil kerdene. Ewro vera cinîyan de tacîz, tecawiz û her tewir şîddet yeno kerdene û yê ke nînan kenî bi hawayo baş nînî mehkeme kerdene. Sey qetilkerdişanê bînan, qetilbîyayîşê cinîyan zî hetê mîyanneteweyî de bêceza manenî.” Wa destek bidî çalakîyan TJK-Eye peynîya îzehetê xo de veng dayo heme cinîyan û îzehet wina qedîyayo: “Seba ke 3ê Tebaxe bibo Vera Qetilbîyayîşê Cinîyan û Qirkerdişî de Roja Çalakîya Mîyanneteweyî, do 3ê Tebaxa 2018î de heme cayê dinya de rayberîya cinîyan de bi siloganê ‘Azadîya Cinîyanê Şengalî, azadîya merdimîye ya’ çalakîyî bêrî viraştene û saete 18.00 de zî deqayêk rêz bêro girewtene. Sere de Ewropa û cinîyê ma yê çar parçeyê Kurdistanî, kesê ke xo bi hawayo demokrat û şorişgêr şinase keno, wa destek bidî nê çalakîyan û piştîdayîşyewbînanî gird bikerî.” ANF/BRUKSEL