Komeleya Dostî Hetkarîya Dostan Kenî Almanya de seba destekdayîşê kesê ke erdlerzê Wanî ver mexdur bîyî amebî awankerdene. Komele awanbîyayîşî ra nata hetkarîye daya xeylê projeyan. Tewr peynî zî destek da projeyê ‘îmalatê yowxeyî’ û no proje ver 15 cinîyî xebetîyenî.
Sereka Komeleya Dostî Hetkarîya Dostan Kenî Ayşegul Arase proje ser o melumatî dayî. Arase va ‘Dêrsim de problemanê tewr girdan ra yew zî bêkarbîyayîşê cinîyan o’ û wina domnaye: “Bi no qeyde ma no problem ser o tayê fikirîyayî. Peynîye de fikrê îmalatê nanê yowxeyî vejîya. Ma proje pêşkêşê komele kerd. Cuya komunale û piştîdayîşyewbînan kulturê herême de estî. Ma do hîna zaf cinîyanê dêrsimijan reyde bixebetyî.”
Arase va ‘îmalatxane seba cinîyan gamêka şenik a’ û wina dewam kerde: “Ma do projeyanê neweyan de zî ca bigîrî. Amancê ma o yo ke ma cinîyan rê kar bivînî. Çîyê ke serkêşîya ci cinîyî kenî reyde ez kêfweş bena. Projeyê ma de patron û sewbîna kesî çin î.”
Cinîyî zanayîşanê xo kenî yew
Şêwirmenda projeyî Yildiz Gunduze zî da zanayene ke ê cayo ke ameyo akerdene cafe ra zêdeyêr, sey cayê cuyayîşî vînenî û ê hem wayîr î û hem zî virazenî. Cinîyan ra Şukran Yalçina ke verê cû amebî îxraçkerdene, wina va: “Amancê projeyî cinî yî. Ma hewl danî bi nê projeyî zanayîşanê xo bîyarê têhet. Ma hewl danî bi reng û ziwanê cinîyan îdare bikerî.” n MA / DÊRSIM