Rêxistina cinîyan ya bi nameyê Gulabî Gangî ke Hîndîstan de awan bîya, vera feqîrî û sucê ke cinî û domanan rê benî de têkoşîn dana. Nika 400 hezar ra zêde endamê na rêxistine estî. Na rêxistine 2006 de hetê Samat Pal Devîye ra herêma Banda de ameya awan kerdene.
Na herême de zîhnîyetê camêrdî hakim o, nîsbetê wendiş, nuştişê cinîyan kêmî yo, zewajê domanan, karkerîya domanan, şîddetê mîyanê keyeyî û sewbîna çîyî xeylê zaf î. Na rêxistine nameyê xo rengê cilan û zopeyê destê cinîyan ra gêna.
Goreyê xebera Gazete Duvarî, Ronayoxa rêxistine Devîye vana ‘ma sey çeteyê ke yenî zanayene nîyî, ma çeteyê edaletî yî’ û wina dewam kena: “Na rêxistine ewila merde, pî û birayê lacekinî ke zextan kenî xo kerd hedef û do înan îkna bikerdêne. Yê ke îkna nêbîyêne, vera înan de xopawitişê cewherî biameyêne bikar ardene. Cinîyî vera nînan de zopeyan şuxilnenî û xo pawenî.”
Na rêxistina ke hetê polîsan ra bi hawayo ‘Maoîstê mîlîtanî’ ameya name kerdene, mudaxaleyê neheqî û şaşîyan kena. Rêxistine heta nika bi kerdişanê xo heme cinîyan rê bîya hêvîye.
AMED