Sewate ale daliqnayişî dewletbîyayiş zî hewce nêkeno. Enka vanî ke “Teyna şarê ke dewleta înan estê eşkenê xo rê jû ale dîyar bikerî” no feraset, feraseta netew dewletî ya û bêguman mezgada çewt o. Di roja ma ya eyro de yew aleyê her timê futbolî zî esta. Tenya ê zî nê, her holdîng û şîrketanê pîl xo rê yew ale virazenî û wazenê bi ê sembolî peyamanê xo bidê ciwakî û bi no rayir bieşkê reqlamê xo bikerî. Reyna, aleyanê partî û rayvistenan zî estê. Her partîyê sîyasî, goreyê birdozîya xo aleyê xo dîyar kenê û êyî ser o ra propaganda virazenê.
Beyankerdişê kamîyê yê
Bi no riwal ra, alê tenya sembolîzm zî nîya. Weçînayiş û pejirnayişê yew aleyî di heman wexte de yeno maneya beyankerdişê kamîya xo. Yanê alê sembol bîyayişî rey de yew aîdîyetî îfade keno. No zî di mîyanê merdimateyî de ca û cîyateya şaran dîyar keno.
Di roja ma ya ewro de, şarê ke aleyê înan dîyar nîyê yan zî çinîyê nêyeno veynayiş. Merdim eşkeno vajo ke, di no mijarî de zî ma kurdî şaranê binan ra cîya benê, abiriyenê.
Di Rojhilata Mîyane de çewres milan kurd ciwîyenê, la ewro yew aleya ma ya neteweyî yê ke hemeyî kurdan êyî sey aleyê xo yê neteweyî biveynîa, çinîyo! Di nê erdan de duwês hezar ser tarîxê ma esta. Ciwakbîyayiş bi ma ya dest pê kerda; rayirverîya xeylê çîyan ma kerdime, la belê ewro yew aleya ma yê neteweyî zî çinya. No zî nawnena ma ke şarê ma çendî xorî kewto û roşnayê x ora dûrî visyaya.
Kurd ewro bê ale yê
Tarîxê ma de tenîya yew ale nê beno ke bi seyan aleyê Kurdan virazîyaya; la ewro çinya! No zî yena na mana ke ma raşteya xo yê tarîxî û çanda xo yê qedîm ra ameyime durî vistene. Ana nêbîyayê se, ewro yew aleya neteweyî yê ma kurdan zî do bibîyanê. Tayinî eşkenê alaya Komara Mahabatî sey fînak binawnê û vajê ke “Alaya neteweyî yê kurdan a ha no yo.” La mi gore no fînak raşt niyo. Ewro zî partîya kêy Barzanîyan, yanê PDK aleya Komara Mahabadî, nêeşkeno çand û tarîqê kurdan temsîl bikero.
Çewres milyonî bê al nêbenê...!
Aleya Komara Mahabadî, yê ke enkaz î sey aleya Vaşurê Kurdistanî yeno gurenayiş, taqlîdê aleya dewleta Îranî ya. Dema Komara Mahabadî yena ronayiş, nawnenê ke aleya înan çinyo . Herûnda ke tarîxê xo bikinê û goreyê çanda xo yew ale bi virazê, şinê armaya şahey aleyê Îranî ra vejenê û herûnda êyî zî yew roja kejê bica kenê. Bi na tewr xo rê yew “Ale” ya taqlît anê pê. No aleya taqlît , Kesk, Sûre û Sipe ya. Mîyanê ci de zî Roja keje esto. La , ma tarîxî ra zanê ke di aleya kurdan de ti rey rengê sipe çinbîya. Sipe rengê kurdan de nîya. Rengê ma yê kurdan û temsîlê Kurdistanî Kesk, Sûre û Keje yê. Nê hirê rengî, Rojhilata Mîyane de kurdan temsîl kenê. Keske xoza û aşitîya, Sûre şer û xoverredayişî, Keje zî bereketa Rojî temsîl kena.
Bi no riwal ra, ganî yew qamiteyado cidî bêra ronayiş. No qomîte ganî reng, sembol û aleyanê kurdan ê tarîxî bi hawayoda bikino û goreyê nêyî zî ganî yew aleya neteweyî bêra dîyarkerdiş. No aleya neteweyî yê kurdan zî yanî bi yew Kongreya Neteweyî bêra îlan kerdiş. Çewres milyon kes bê al nêbenê...!
KENAN AVCI