3. Konferansa Netewî ya Ciwanên Kurd ku li bajarokê Rimêlan di navbera 26 û 29´ê Adarê de hate lidarxistin bi dawî bû û encamnameya konferansê hate eşkerekirin. Di encamnameya konferansê de hate diyarkirin ku serhildana gelê Kurd ku di 19´ê Tirmehê de li Rojavayê Kurdistanê destpê kir di encama destketiyên kurdan de pêk hatiye. Her weha ciwanan destnîşankirin ku hêzên eskerî yên ne girêdayî Desteya Bilind a Kurd (DBK) rewa nabînin û gotin, "YPG girêdayî DBK ye û hêza rewa ya gelê Kurd e." Di konferansê de ji bo ciwanên ku koçber bûne jî bang hate kirin ku vegerin Rojava û piştgiriyê bidin xebatên sazkirina xweseriya demokratîk. Ciwanan her weha xwestin ku ji bo bîranîna komkujiya Helepçe û Enfalê, 16´ê Adarê weke ´Roja Qirkirinê ya Navnetewî´ were qebûlkirin.
Ji bo tevahiya Kurdistanê biryar
Biryarên konferansê
* Divê hemû ciwanên Kurd li ser hêzên siyasî yên Kurdistanê zextan çêbikin da ku kongreya netewî bê lidarxistin.
* Divê destkeftiyên Kurdistana federal û yên Rojavayê Kurdistanê bêne parastin û xwedî lê bê derketin. Hemû hêzên Kurdistanê bêyî ku bikevin nava siyasetên hizbî pêwîst e piştgiriyê bidin Rojavayê Kurdistanê.
* Desteya Pispor a Leşkerî ku YPG jî di nav de cih digire û girêdayî Desteya Bilind a Kurd e, pêwîste çalak bibe.
* Desteya Bilind a Kurd îradeya siyasî a gelên Rojava ye. Pêwîste çar parçeyên Kurdistanê piştgiriyê bidinê û rewa bibînin.
* Pêwîst e bi piştgiriya hemû hêzên Kurdistanê sîstema zanîngehan li Rojavayê Kurdistanê bê avakirin. Ji bo perwerdeya zimanê Kurdî jî bingeha heyî bê xurtkirin.
* Em bang li ciwanên ku ji ber sedemên aborî, ewlekarî û hwd. koçber bûne dikin ku vegerin û di nava şoreşê de cih bigirin.
* Ji bo ku rejîma Baas bê rûxandin em bang li hemû sazî û dezgehên Kurdan dikin ku bi riya ragihandin û aboriyê zextan çêbikin û çalak têbikoşin.
* Daxwaza me ew e ku bi beşdarbûna hemû hêzên siyasî yê Rojavayê Kurdistanê di demeke herî kurt de di bin alekê de hikûmet û parlamento bên avakirin.
* Em wekî ciwanên Kurdistanê hêzên çekdar ên ku di bin sîwana Desteya Pispor a Leşkerî ya Desteya Bilind a Kurd de cih nagirin rewa nabînin. Hewldanên bi vî rengî helwestên dijminane ne û li dijî berjewendiyên gelê Kurd in.
* Em hêzên siyasî yên Kurdan ên ku ax û erdnîgariya Rojavayê Kurdistanê dikin mijara bazarê, şermezar dikin û vê mijarê wekî xala sor ya xwe dibînin.
* Şoreşa 19’ê Tîrmehê ya Rojavayê Kurdistanê nirxekî gelê Kurdistanê ye. Pêwîst e destkeftiyên vê şoreşê ji aliyê hemû ciwanên Kurdistanê ve werin parastin.
* Em wekî ciwanên Kurdistanê bi çi şêwazî dibe bila bibe, ji aliyên hêzên derve ve destwerdana li ser Rojavayê Kurdistanê wekî dagirkirina Kurdistanê dibînin û li hemberî vê têkoşîn dikin.
* Em ji bo azadiya yek ji Rêberan Birêz Abdullah Ocalan û hemû girtiyen zindanan têkoşîn dikin û vê yekê wekî erkekî exlaqî dibînin. Em wekî ciwanên Kurd piştgiriyê didin pêvajoya ku ji aliyê Birêz Abdullah Ocalan ve hatiye destpêkirin.
* Hemû partiyên siyasî pêwîst e ji hêza ciwanan sûd werbigirin û pêwîste ciwan jî di nava partiyan de rola pêşengatiyê bilîzin û bingeha xwe xurt bikin.
* Em wekî ciwanên Kurd, di bin navê ol, mezheb û bîrdoziyên biyanî de arastekirina ciwanan şermezar dikin.
* Em di pêvajoyeke pir hestiyar re derbas dibin, divê ciwanên Kurd di vê pêvajoyê de rola xwe ya pêşeng bilîzin.
* Em li hemberî polîtîkayên rejîma Îslamî ya Îranê hişyarkirina ciwanan weke erkekê dibînin. Li hember kuştin, darvekirin û bêhişkirina ciwanên Rojhilatê Kurdistanê, di warê çandî, siyasî de û ji bo demokratîzekirinê têdikoşin û li ber xwe didin.
* Em wekî ciwanên Kurd ji bo Kurdistaneke demokratîk li hember zîhniyeta pîrsalari (jerontokrasi) û baviksalarî têkoşin dikin.
* Divê ciwanên Kurd ji bo pejirandina destûreke parlamenterî û demokratîk a bi rêya referandûmê li Başûrê Kurdistanê bikevin nava hewldanan.
* Ciwanên Kurd li dijî sîstema modernîteya kapîtalîst û sermayedarî têdikoşin û ji bo pêşxistina çanda Kurdayetî, civakeke exlaqî û polîtîk kar û xebat dikin, her wiha modernîteya demokratîk pêş dixin.
* Pêwîst e bi tu şêweyî şerê navxweyî neyê dûbarekirin, hemû alî şerê birakujiyê şermezar bikin û li hemberî vê yekê rawestin.
* Li hemberî qirkirina jinên ciwan û êrîşên wekî, “recim, darvekirin, fuhuş, berdêl, duzewac, di temenê biçûk de zewicandin û sîxe li Îranê” yên li hemberî hemû jinan, wê têkoşîn bê dayîn û ji bo azadiya jinê têkoşîn bê kirin.
* Em wekî ciwanên Kurd komkujiya Parîsê şermezar dikin. Hersê hevalên jin (Sakîne Cansiz, Fîdan Dogan û Leyla Şaylemez) û jinên Kurd ên wekî Leyla Qasim wekî pêşengên jinan dibînin. Dewleta Feransayê heta bûyer bê zelalkirin em wekî berpirsyar dibînin.
* Banga me ji bo hemû hêzên navnetewî ewe ku kîmyabaran û enfal wekî “Roja qirkirinê ya cîhanê” were naskirin û 16'ê Adarê jî wekî “Roja jenosida navnetewî” bê pejirandin.
* Em wekî ciwanên Kurd ji bo ku navçeyên ji Başurê Kurdistanê hatine veqetandin bi ser Kurdistanê ve bê girêdan û madeya 140’an a Destûra Bingehîn a Iraqê were pratîzekirin, têkoşîn dikin.
* Em ji vê konferansê cudatir, pêkanîna konferanseke din a bi navê sêyemîn konferansa ciwanan bi tu awayî rewa nabînin û hewldanên bi vî rengî şermezar dikin.
* Em her cure êrîşên weke êrîşa li Şengalê ya di 15’ê Tîrmeha sala 2007’an de pêk hatiye û êrîşên li ser kêmnetewên wekî Êzîdî, Elewî û Asûrî şermezar dikin.
* Ger ku di nava salekê konfederasyona ciwanan pêk neyê, em biryar digirin ku 4’emîn Konferansa Netewî ya Ciwanên Kurd li Ranyayê were lidarxistin.
ANHA/GIRKÊ LEGÊ