Netîceyê hêrişê hewayî yê dewleta Tirkî de 15ê Tebaxa 2018î de Newala Şilo de Endamê Koordînasyonê Komelê Êzidîyan Mam Zekî Şengalî şehîd bibi. Şengalî serrgêra şehadetê xo de cayo ke şehîd bibi de ame yadkerdene.
Bi seyan kesê ke mîyanê înan de endamê Yewîya Ciwananê Êzidîyan û Yewîya Cinîyanê Êzidîyan tede estbî, seba Mam Zekî çalakîya rayraviraştişî viraştî. Çalakîya ke cayê şehadetê Mam Zekîyî de dest pêkerde, heta Bexçeyê Mam Zekîyî dewam kerde. Çalakîye de siloganê ‘Wa bimiro xîyanet’, ‘Şehîd nêmirenî’, ‘Mam Zekî bêmerg o’ û sewbîna ameyî eştiş û posterê Rayberê Şarê Kurdî Abdullah Ocalanî û Mam Zekîyî ameyî akerdene.
Bexçeyê Mam Zekîyî de îzehetêk dîya çapemenîye û îzehet hetê Elî Miradî ra ame wendene. Miradî va ‘bi wesîleya serrgêra 35. ya Hemleya 15ê Tebaxe, ma heme şehîdan vîr anî û ma soz danî ke ma do têkoşînê înan gird bikerî. 15ê Tebaxe vera zulmkar û zaliman de Zîndanê Amedî de dest pêkerd. Hemle tena hemleyêka leşkerî nîya, eynî wext de newe ra welidîyayîşê şarî yo. Mam Zekî seba Êzidîyan bi serran têkoşîn da û xebate da domnayene. Labelê dewleta Tirkî û hemkarê ci Mam Zekîyî qetil kerd. Ciwanê Êzidîyan do bêrî têhet û cewabê dewleta Tirkî bidî. Ganî ma wayîrê têkoşînê Mam Zekîyî bivejyî.”
Îzehet ra dima Îdarekarê Beldeya Til Ezerî Celal Xelef û cinîya Mam Zekî Şengalîyî Gulîstan Ozdene zî îzehetêk daye.