Ciwanê elewîyî Şûbeyê Stenbolî yê PSAKDî de ameyî têhet û kombîyayîşêk viraşt. Ciwanan kombîyayîş de qala muhîmîya ziwanî kerdî û bale antî tehlukeyê asîmîlasyonî ser. Ciwanan da zanayene ke ê do kombîyayîşanê xo bidomnî.

Ciwanê elewîyî hamnanî kampêka ke hetê Komela Kulturî yê Pîr Sultan Abdalî (PSAKD) ra amebî organîzekerdene de amebî têhet û aye kampe de kultur, bawerî û pêroyîya elewîtîye ser o perwerde dîbî. Ciwanan o wext kampe de zext û tedayê ke elewîyan ser o benî de amebî zanakerdene û amebî vatene ke ê do dima ra reyna bêrî têhet û kombîyayîşanê xo bidomnî.

Na çarçewa de ciwanê ke Şûbeyê Stenbolî yê Komela Kulturî yê Pîr Sultan Abdalî de ca gênî, Cemxaneyê Îçerenkoyî de ameyî têhet û problemanê xo ser o munaqeşe kerdî. Ciwanan ewil pîya arayîya xo kerdî û dima ra probleman ser o munaqeşe kerdî û tewr peynî zî deyîrî vatî.

Kombîyayîş de Pîr Sefa Ozturkî qiseykerdişêko kilm kerd û qala muhîmîya vilakerdişê loqme kerd. Ozturkî dîyar kerd ke bi çimvêşanîyêka girde, dinya yena talankerdene û va ‘çîyo hempar yê gandar bîyayîşî loqme yo’. Ozturkî dima ra gulbang da û ciwanan arayîya xo kerde.

‘Vernîya ma de rayîrêko derg esto’

Ciwanan ra Utku Şahînî babete ser o va ‘ma bingeyê na xebate kampa hamnanî de eştbî’ û wina domna: “Labelê ma zanî ke nê problemî wina asan çareser nêbenî. Ganî bi bawerî û têkoşînêko topyekun bêro dayene. No kombîyayîş tena haletêk o. Ma aktîvîteyanê xo de hîna zaf ‘gelo ma senî eşkenî bawerîya elewîtîye hîna baş bidî cuyayene’ ser o vindenî û ma cewabê nê persî gêrenî. Ma xebatanê winasîyan kenî. Xebata ewroyên seba ma destpêk a û baş derbaz bîya. Ma seba ke xo biresnî hîna zaf ciwanan, vernîya ma de rayîrêko derg esto.”

Eke xebatî bibî, do kultur zî aver şêro

Ciwanan ra Mert Karaboyayî zî va ‘ma rayîrê ciwananê elewîyan û şîyayîşê cuye ser o qisey kerd’ û wina dewam kerd: “Raştîya xo de ciwanî temînatê sibayan nê, yê ewro yî. Ma tena hetê kultur û hunerî yê elewîtîye de nê, hetê ci yê bawerîye zî girewt dest. Eke hetê bawerîye de xebatê başî bêrî kerdene, o wext kultur û huner zî do aver şêrî. Kombîyayîşê winasî muhîm î û ganî dewamê ci zî bêro.”

Cemxaneyî sey verênî nîyî

Ciwanan ra Alîcan Demîrcîyî zî dîyar kerd ke înan kombîyayîş de problemê xo yê rojaneyan ser o munaqeşe kerdo û wina va: “Sey wextanê verênan cemxaneyan de yewîye û piştîdayîşyewbînan çin î. Ez cemxaneyanê nikayinan de çîyanê verênan nêvînena. Verê cû cemxaneyan de kulturê elewîtîye hîna zaf estbî. Labelê nika dayena qurbanî, qursê tembûrî, qursê semahî û sewbîna ra vîşêr çîyêk çin o. Tayê cemxaneyan de kesê ke semah bigîrî zî çin î.”

Ciwanan kombîyayîş de qala asîmîlasyonî kerdî û dîyar kerdî ke asîmîlebîyayîşê ciwanan ziwan de dest pêkeno û dayî zanayene ke wina beno ke herinda mefhûmanê elewîtîye de sewbîna mefhûmî yenî bicakerdene û cuya rojaneyî de nê mefhûmî yenî bikarardene.

 

PÎRHA / STENBOL