Bi desan dirbetinî
Qezaya Şirnex Cizîr de sûcê merdimî yê dewleta Tirk rameno. Tewr peynî, welatijo bi nameyê Serhat Altûn ke didi rojî zey dirbetin mehle de mend, weşiya xo kerd vinî. Herzewbîn vizêr çetayê AKP, welatijê ke mehleya Cûdî ra dirbetinan girotî da ver guleyan. Çeteyanê AKP ser kuçeyê Nisêbîn de, wesayîtan ra gule vorna ser welatijan û xeylê kes bî dirbetin. Dirbetinan ra taynê ci hewadiyay nêweşxane, la 3ê ci wextê derg mehleyan de mehsûr mendî, peycoy hewadiyay nêweşxane.
Dirbetinan derb kerdî
Ambûlansê şaredarî ke şi mehle û dirbetinan girot hetê polîsan ame vindernayen. Polîsan ambûlans kirêşt qereqolê Konaxê Hikûmet û kamiya dirbetinan qontrol kerd. Peycoy dirbetinî û şoforê ambûlansî hetê polîsan amey derbkerdiş.
Sariyildiz hedef girotiya
Tîmanê teybet êrişan de wekîlan zî hedef girot. Keyeyo ke Parlamenterê HDP yê Şirnex Faysal Sariyildiz, hemşaredarê Cizîr Kadîr Konur ra piya 20 kesî mendî, bi top û guleyan hedef ame giroten. Sariyildiz o ke bin gulevornayinê dewlet de mend qisey kerd va, ‘Cizîr de nika wehşeta AKP esta”. Sariyildiz’î MHMA waşt ke dekewo hereket, zewbîn bena piyakarê sûcî.
Heta bîn ra, Kameramanê ÎMC Tv Refîk Tekîn zî wextê taqîpkerdişê xeber, netîceyê êrişanê dewlet de bi dirbetin.
DÎHA/ŞIRNEX