Qezaya Cizîrî ya Şirnexî de mabênê 14ê kanûna 2015î û 2ê adara 2016î de qedexeyê tebervejîyayîşî amebî îlankerdiş, labelê herçiqas ke 2 serrî derbaz bîyî, labelê reyna zî cenazeye xeylê kesan nêameyî dîyayîş.
Seke yeno zanayîş cêrzemînanê Cizîrî de nizdîyê 130 kesî hetê hêzê dewlete ra ameybî qetilkerdiş û nînan ra cenazeye 16 kesan hema zî nêameyî dîyayîş. Keyeyê ke 2 serrî yo muracat kenî, wazenî ke wa yew mezelê înan bibo. Keyeyî dîyar kerdî ke cenazeye waro ke nika înşaatê TOKÎye dewam kenî de yî. Heta nika ewja de 3 cenazeyî ameyî dîyayîş û seba vindarnayîşê înşatî heme muracatê keyeyan yenî redkerdiş.
Babete ser o keyeyî qisey kerdî û vera na rewşe de reaksîyon nîşan dayî. Hezne Aslana ke 2 domanê xo vînî kerdî, wina va: “Mi cenazeye lajê xo Saîtî dî, labelê ya kênaya xo nêdî. Mi 2 reyan nimûneya gonîye da. Kênaya mi cêrzemîno yewin de bî. Tayê şewan kênaya mi yena hewnê mi. Wa selahîyetdarî aqubetê cenazeyan dîyar bikerî.”
Ez paweyê cenazeya xo ya
Cinîya Osman Gokhanî ke cenazeya ci hîna nêameya dîyayîş Taybet Gokhane zî va ‘domanê mi seba pîyê xo mezelêk wazenî’ û wina domnaye: “Tewr peynî nameyê mêrdeyê mi cêrzemîno yewin de derbaz bî. Ez bi 7 domananê xo her roje pawena ke wa mêrdeyê mi biagêro. 2 aşmî verê vistirîya mi merde, labelê mergê xo ra ver zî nimûneya gonîye daye. Lajê mi zî da. Labelê hîna nêameyo dîyayîş.”
Nameyê 16 kesê ke cenazeyê înan nêameyî dîyayîş nê yî: Ferîde Yildiz, Sakîne Durmîş, Mardîn Çelebî, Hacer Aslan, Osman Gokhan, Huseyîn Dervîşî, Servet Aslan, Serdar Pîşkîn, Îdrîs Susîn, Alî Aslan, Cemal Purlek, Emrah Aşkan, Osman Esmeray, Ruken Alpaslan, Mustafa Keçanlu ve Emrah Aşkin.
MA/ ŞIRNEX