Domanî, pîzeyê maya ci de kiştî
Çeteyê AKP yê ke 8 rojiyo nêşiyay dekewê mehleyanê Cizîr tanq û topan vistî dewre û keyeyan topvaran kenê. Bi desan keyeyî netîceyê topeştişan de rijiyay, xeylê kesî zî bî dirbetin. Çeteyanê AKP vizêr mehleya Nûr de ceniya dicanî ya 32 serrî Guler Yanalak hedef girot û gule rijnay pîzeyê Yanalak ser. Yanalak a ke giran bî dirbetin, bi seatan ambûlans pawit. Badê çend seatan, domano 7 aşmî, o ke hona pîzeyê ma ya xo de bi, weşiya xo kerd vinî.
Heta bîn ra, pirodayişanê vizêr de jew esker ame kişten. Herzewbîn seatanê sodir de, gencan mehleya Yafes de jû teyarekeka dîmenantiş Drone vist war.
Ma mirenê, la teslîm nêbenê
Verra zilm û terora dewlet Cizîrijî ver barîqatan de nobed gênê, rixmê tanq û topan xover danê. Welatij Sevkan Yaman, o ke mehleya Yafes de nişeno ro va, “şima pêrokîn keyeyan zî birijnê nameyê tiya kurdistan o”. Welatijan ra Vesîle Sarica vist vîrî ke, êrişan de topan erzenê û aşkere kerd ke rixmê her çî ê ser payan de yê û va, “Beno ke ma kuçeyê xo de bimirê, la ma dê teslîm nêbê. Ceniya bi nameyê Ayşe Mazger’î da zonayen ke kuçeyan de gerîla çinyo, qeçê îynan estê û vist vîrî ke, herkes keyeyê xo paweno.
Kesê ke amey kişten sivîl ê
Hemserokê Meclîsê Şar yê Cizîr Mehmet Tûnç û azayê YDG-H Tekoşer’î damûstayinê TSK zûrrî vetû û aşkere kerdî ke Cizîr de heta nika 6 kes amey kişten û pêrokînî zî sivîlê. Ewro verra Cizîr û Sîlopî nûmayişê xeylê rêxistinan viraziyeno.
Ablûqayê dewlet yê qezaya Şirnex Sîlopya zî roja 8. de ramena. Çeteyê AKP keyeyan bombevaran û gulevaran kenê. Şar bi qetlîaman ra rî bi rî yo. Qeza de bi seyan doman, cenî û welatijê dirbetinî estê.
Şewa roja şemî de çeteyanê AKP mehleya Nûr de gule vûrna keyeyê welatijan ser. Netîce de, ceniya bi nameyê Taybet Înan û vistewreyê ci Yûsif Înan bî dirbetin. Taybet û Yûsif Înan, rîwale ke, mudaxaleyê tibî nêbi, weşiya xo kerdî vinî. Herzewbîn welatijan ra, dirûmê Halît Înan’î zî zaf giran o. 250 welatijî, 4 rojiyo bodrimê banî de mehsûr mendê. Çormeyê ban hetê esker û polîsan ameyo giroten. Welatijan ra Abdurrezak Yîgît’î aşkere kerd ke, ‘eke mudaxale nêbo, qetlîam do viraziyo.’
DÎHA