Hardê Mem û Zîn, yê Feqiyê Teyran, Arîf Cizrawî, Mîr Bedîrxan, yê Berîvan’an, qeleya xoverdayiş Cizîra Botan bi rojano ver zilm û hêrişanê dewleta romî xover dano. Çend rojiyo çormeyê Cizîr bi tanq û topan, bi qûwetanê qetilkar yê dewlet ameyo giroten. Rixmê pêrokîn hêrişanê dewlet, qeçek, cenî, kal û pîr, pêrokîn şarê Cizîr serreyê xo nimiz nêkeno, qedexeyê dewlet nêsilasnenê, xover dano. Heta nika 22 kesî amey qetilkerdin. Bi desan kes zî dirbetinê. Zerreyê kesê ke amey kişten de pitikê çend rojî, çend aşmî, qeçekî, gencî û cenî estê. Nika Cizîr biyo zey Kobanê. Çeteyê AKP zey çeteyanê DAİŞ hêrişê sivîlan kenê. Mehleyê zey Cudî, Nûr, Yafes û Sûr bin ablûqeya çeteyan de yê. Meyitî zerreyê keyeyan de mendê. Cizîrijî meyitê qeçikanê xo zerreyê dolabê cemidî de tepişenê. Kesê ke benê dirvetin rîwalê ke nînê dermankerdin, gonî kenê vinî û şehîd kewnê. Rixmê na trajedî, zilm û zorvajî Cizîrijî fina zî xoverdanê. Çike Cizîr hardê Serhildan û xoverdayinan o. Senî ke ’92’an de xover da, nika zî xoverdano.
Nika derbeya sivîl û eskerî dewre de ya. Endî tîr kevan ra vejya. Dîktatorê derg, o ke Geliyê Doskî de derbeyê gird werd herbê miyanî rameno. Badê fermanê dîktatorê dergî pêrokîn sûkanê tirkiye de çeteyê ci vejyay meydanan, hêrişê bi seyan buroyê HDP, keye û cayanê kar yê Kurdan kerdî, day ver adir. Rayverîna nê çeteyan zî polîsanê sivîl û azayanê MÎT kerd. Tenya AKP nê, wexto ke mesele bena Kurd, pêrokîn partî benê jû û zey îtifaqê nîjadperwer ver dê Kurdan de cephe gênê.
Cok ra Kurdî zey serranê verî, nika zî bi xoverdayiş, tekoşîn û îradeyê xo tenya yê. Bakûrê Kurdistan de şar serva îdareyê xo yê cewherî, serva xosereya xo, ser Cizîr ser payan de ro. Zerya Kurdistan nika bi Cizîr erzena. Rejîmê faşîst yê tirk hewl dano şexs dê Cizîr de pêrokîn îradeyê Kurdan,o ke xoverdano bişikîno. Cok ra no herîş verra pêrokîn Kurdistan’î yo. Cok ra gune, Çewlig, Riha, Sêwereg, Semsûr, Meletî, Dîlok, Gimgim, Sêwas, Qers, Erdexan zî werzo ser payan û vengê xo berz bikerê, wayrê xoverdayişê Cizîr bivejyê. Çi ke Cizîr serva rumet û azadiya pêrokîn Kurdan xover dana. Serkewtişa xoverdayina Cizîr do serkewtişê pêrokîn Kurdistan bo. Cok ra veriya ke berey nêbo gune herkes desinde dekewo hereket. Kesê ke verra nê biyayişan, qetlîam û kiştişan bêveng bimanê, ê dê bibê piyakarê sûcanê merdimî. Zey ceniyanê Cizîr, zey Ceniyê serberz, Berîvan’ê ke verra tanq û topanê dişmenan de destê xo kerdî berz, nika zî, gune herkes verra pêrokîn hêrişan vindero û azadiya welat de role xo kay bikero. Dîrok de zî wina yo, yê ke xoverday, serkewtî.