Hetê Gruba Cînerî Silopî de santralê termîkî ke yeno şuxilnayiş, Koyê Cudîyî de seba gêrayişê madenî, newe rasteyê madenî akerdê û no zî Cudî de beno semedî qirkerdişê xozaye ra, no zî nîşan dano ke bi dişmenî xoza qir kenê.
Mabenê Bêspin û Giteyê Silopî yê Şirnexî de serra 2006î de viraştişê santralê termîkî destpê kerdbî û serra 2013î de no dem bi beşdarîya Serekwezîr Erdoganî akerdişê ci ameybî kerdiş. No santrolê termîkî zî girêdayê Gruba Cînerî yo. Seba resnayişê santralê termîkî ra madenî, Koyê Cudîyî newe rasteyê madenî yenê akerdiş. Demê akerdişê rasteyê madenî zî Koyê Cudyî de bi teqnayişê dînamîtan tunel yenê akerdiş. Çi heyfo ke teqyayişê dînamîtan ser o zî heywan û daran qir benê.
Bi gazê jehrî xoza de qirkerdiş
Gruba Cînerî, bi prosesê çareserîye vindertişê pêkewtişan bi teşvîkê îqtîdarê AKPî, mintiqa de ca girewt. Şîrket, tîtîkê Koyê Cudîyî ra santralê termîkî rona û no santral de zî mintiqaya Şirnexî ra kedkaran bê ewleyî dano karkerdiş, lojina santralî ra zî gazê jehrî vejîyenê û nê gazî zî xozaye ra zirarêko gird danê.
Bi hîşyarî xozaya Kurdistanî çîn kenê
Peynîya xebatê madenî, asurijan ra aîd dewa Herbulî çi heyfo ke çînî bî, xebatê madenê sifte rasteyê Zêrigêr û Çele Şêx Abasê Koyê Cudîyî ameyê kerdiş, nika zî mintiqaya Girê Êzmunê yena kerdiş. Bi makîneyê karî û teqnayişê dînamîtan xozaye ra zirarê gird danê, peynîya teqnayişî zî tozê ke vejyenê cuya ra tesîro negatîf kenê. Mintiqa de taybetî demê peynî hedîseyê nêweşîya laşo ganwer zêdîyayê, rayedaran xo ra qet elaqadar nêbenê, no zî nîşan dano ke xozaya Kurdistanî bi hîşyarî yena qirkerdiş.
Gruba Cînerî ra aîd madenê komirî de, bi teqnayişê dînamît û sîstemê bîrî qirkerdişêko gird xoza yeno kerdiş. Lekolin.orgî de na babete ra balêko gird bi na xebere yena antiş, demê gêrayişê madenî zî zaf hûmarî de darê ameyê birnayiş, çi heyfo ke taybetî zî tewirê endîmîko nebat çîn benê.
Rasteyê madenî hera kenê
Bi rayîrê şuxilnayişê madenî, xoza yena talankerdiş, bi seyan kamyon û kepçe xebityenê, her ke şono rasteyê madenî hera benê. Welatijan çiqas gerraker bibî zî çi heyfo ke qirkerdişê xozaya Koyê Cudîyî domyeno.
MERKEZÊ XEBERAN