Rayberê HDPê Amedî Alçîçek aşkera kerd ke cuya Ahmet Çobanî verê zilmî bi têkoşîndayişî resa nê rojan, no ser demê serekîya sendika, Anatolîya Zerîn ra ame surgunkerdiş û cuya ey her tim bi surgunan vîyart.

LÊL AMED / AMED

Raya pêroyine ra Ahmet Çoban rojdemî ra bi na xebere ame ‘Mergî ra pey karê xo ra ame îadekerdiş’ Çoban bi KHKî ameybî îxraçkerdiş, bi serran persê ‘Bi serran qey, çi semed’ ra verpers gêra la verpersê nê persan dîyar bî, kesêko bi zînharin. Na çekû îthamêko bi giran, serra 1980î ra nika, çekûyêka bi qabus, her tim verê ma vejîyeno. Qerarê darazî esto, çin o muhîm nîyo.

   

Ahmet Çoban dest pê têkoşînê huquqî kerdbî, seba agêrayişê karî zî doz akerdbî, demê doze zî nêweşîya rîşa merdimwere ra kewtbî. Peynîya mergî, têkoşînê bi serran qerarê ‘Şima karê xo ra agêrayî’ ame dayiş. Ahmet Çoban serrê 90î de Amed de sazîya Defterdarî de xebityaynî, demê ke hedîseyê kerdoxê nêdîyar, vaşnayişê dewan de xo xebatê sendîkaye de dîybî. Hetanê Sekerîya Şaxa Amedî ya BESî ra berz bibî. Surgunan ser o malbatê ey, demê girewtişê dibistane Urgup ra şîynî, demê akerdişê dibistane Amedî ra agêraynî, nê zilm 4 serrî domyeno.

Urgup de çew malbatê ey de qise nêkeno, hetta urgupij vanî terorîs ameyê. Çoban ray ray qireno û vano ke ez berîya domananê xo kerda la destê ci ra çik nîno. Çoban de peynîya îxracî nêweşîya şekirî zî vejîyeno, no ser nêeşkeno bivejo teber. Çimkî seba ke sigortaya ci betal bîyo, nêeşkeno şîro nêweşxaneyî. Peynîya mergî çi heyfo qerarê karê ra agêrayişî yeno dayiş.

Abdurrahîm Alçîçek nika Rêxistinê HDPî yê Amedî de ca gêno, verê ci Wezaretê Edeletî de xebityaynî, o zî sey Ahmet Çoban KHKî ra îhraç bîyo. Alçîçek Ahmet Çoban reyde xebatê sendîka de ca girewto û têkoşînê Ahmet Çobanî ser o qise kerd.

Çoban her tim têkoşîn daynî

Rayberê Rêxistinê HDPî yê Amedî Abdurrahîm Alçîçek vat ke o zî demêk Sendîkaya Kedkaranê Buroyî rayberî kerdo û uca de Ahmet Çoban şinasneyo û wina vat: “Embazê Ahmet yew dem Serekîya BESî zî kerdbî, demê serekîya sendîka Anatolîya Zerîn ra ame surgunkerdiş û cuya ey her tim bi surgunan vîyart. Mîyanê BESî de zaf bi sazî ra embazê ma estbî sey sazîyê Wezaretê Edeletî, walîyîye, Ewlehîya Komelî, ÎŞKUR, Pîyango û DMO. Heme embazê ma bi rayberîya Ahmet Çobanî têkoşîn daynê.”

Qerarê Komîsyonê OHALî

Rayberê Rêxistinê HDPî yê Amedî Alçîçek aşkera kerd ke Çoban her cayê xebatê sendika de ca girewto, her daîm aktîvîstê tekoşînî yê verê zilmî bî û wina domna: “Çi heyfo ke peynîya Hedîseyê 15’ê Temmuze Tirkîya de bi OHALî bi hezaran kes ameyî îxrackerdiş, nê embazan ra yew bî embazê ma Ahmet Çoban bî. Peynîya îxracî embazê ma Ahmet çi heyfo persgirikê ekonomîye ant û no ser rîşa ci de nêweşîyêka bi giran kansêr vejîya. Na nêweşî ser serrêk tedavi dî la belê peynî cuya xo da. Çi balo ke peynîya mergî heqê embazê ma Ahmet Çobanî de Komîsyonê OHALî qerarê karê xo ra agêrayişî da.”

Tewro peynî Alçîçek pare kerd ke nika bi hezaran kesî bi KHKî ra ameyî îxrackerdiş û wina qedîna: “Embazî ma ke îxrac bîyê, psîkolojîya înan qet weş nîya, êdî sey verin nêvejenî teberî û hetta reaksîyonê xokiştişî zî nîşan danê. Taybetî embazê ma persgirikê ekonomîye ancenî, ganî bi lezî şaşî tep gam bêro eştiş û embazê ma ke KHKî ra karê xo ra ameyî vetiş, tepa do biagêrê karê xo.”