Îbrahîm Ayhanî wextê mektebî de Tevgerê Azadîya Kurdî şinasnayo û heta peynîya emrê xo têkoşînê şorişgêrî de ca girewt. Ayhanî cuya xo de qet têkoşîn û bawerîya xo ra tavîzî nêdayî, cok ra hertim bîyo hedefe dewlete. Cuya Ayhanî bi zext, îşkence, zîndan û surgunan derbaz bîye.

 

ERDOGAN ALAYUMAT / MA / RIHA

Parlamenterê HDPyî yê verên Îbrahîm Ayhan hewteyêk verê bajarê Hewlêrî yê Başûrê Kurdîstanî de netîceyê krîzê qelbî de wefat kerdbi û 2 rojî verê Sêwregi de ame defin kerdene. Ayhan surgun de wefat kerd û o kesê ke surgun de wefat kerdî ra ne yê sifteyîn o û ne zî yê peynî yo. Ayhan wexto ke lîse waneno, Tevgerê Azadîya Kurdî şinasneno û wextê unîversîte de vejîyeno aver. Ayhan serranê 90î de dest bi sîyasetî keno û hema vaje heme partîyanê sîyasî yê kurdan de cayê xo gêno.

Ayhan serra 1991î bi sebebanê polîtîkan ver, derheqê ci de qerarê tepiştişî vejîyeno. Ayhan cezayan ver Edene, Stenbol û Anqara de cuyeno. Ayhan nizdîyê 3 serran wina cuyeno û 3 serrî ra dima qerarê tepiştişî yeno wedarnayene. Ayhan serra 1998î de dest bi mamostatîye keno û mîyanê sendîkaya KESKî de ca gêno. Verê îdarekarî, dima ra sekreterî û serekîya şûbeyî yê sendîka keno.

   

Ayhan 2007 de Riha ra beno namzed, labelê seba ke bendê weçînayîşî esto, nîno weçînayene. Labelê 2011 de BDP ra beno parlamenter, labelê o wext zîndan de yo. 2014 de tehlîye beno. Ayhan parlamenterîye ra dima mîyanê şarî ra nêvejîyeno. Ayhan weçînayîşê 2015 de reyna beno parlamenter. Seba ke prosesê çareserîye xira beno, hêrişî dest pê kenî. Ayhan bi hewteyan Nisêbîn de hetê şarî de cayê xo gêno û xover dano. Labelê destpironêginayîya Ayhanî yena wedarnayene û cezaya zîndanî dîyena ci. Babete ser o warezaya ci Nujen Ayhane qisey kerde.

Warezaya Ayhanî Nujen Ayhane vana ‘Îbrahîm bi hawayo kedkar dest bi têkoşînî kerd’ û wina domnaye. “Hîna domanîya xo de xebetîyeno û hetê madî de destek dano keyeyê xo. O bi nê xusûsîyetê xo mîyanê komelî de cayê xo gêno. Merdimî ci rê rêz gênî.”

Hertim xo aver berdêne

Ayhane va ‘Îbrahîm tetîlan de ameyêne keyeyê ma û kitabxaneyê mi ra ewnîyayêne’ û wina dewam kerde: “Wexto ke bidîyêne ke ez klasîkanê tirkan wanena, mi ra cigîrîyayêne û vatêne ‘nê kitaban mewane, nê psîkolojîyê to xira kenî’. Ey klasîkanê dinya û yê rûsan pêşnîyazê mi kerdêne. Ey hertim wendêne û xo aver berdêne. Mîyanê xebatanê wendekaran de ca girewtêne. Seba azadîya kurdan û demokratîkbîyayîşê Tirkîya têkoşîn dayêne. Cok ra hertim raştê zext û îşkenceyan ameyêne.”

Werekna nîme de nêmendêne

Wareza Ayhane peynîya qiseykerdişê xo de wina va: “Demê ci yê peyênî mîyanê zehmetîyan de derbaz bîyî. Ayhan kura de neheqîyêk bibîyêne, o zî ewja de bi. Labelê şîyayîşê xo ra ver zaf zehmetîyî antênê. Vindetiş goreyê ci nêbi û demanê peyênan de nêşênayêne çîyêk bikero û stresê ci cuyayêne. Vatişê xo yo peyên de vatêne ‘ma wextanê zehmetinan ra derbaz benî û tena betilîyenî’. Qet nêwaştêne fek welatê xo ra verabido û şêro Ewropa. Werekna nîme de nêmendêne.”