Nika Kurdistanê de şerekê bîyayîş û çinbîyayîş esto.
Çîyo ke bajar û koyanê Kurdistanê de qewimîyeno çîyo ke qij nîyo. No şerî de qederê Kurd û Kurdistan yeno tayînkerdiş. Şero ke esto, beynatê şarê kurd û dewleta dagirker (kolonyalîst) yê tirk de ramyeno.
Wexto ke ma vanî dagirker çîyêk hina rehet nîyo. Dagirker talanker o, neyar o, kiştox o. Tirkê dagirker, pê (bi) zorî destê nawo welate ma ser o. Yane ma qalê dewleta tirk kenî. Dewleta tirk dewleta ma nîya. Hezar serrîya ameya kewta welatê ma. Çîyê ma esto û çino dest nawo ser. Her roj her deqîqe gonîyê şarê ma rijnena. Şarê ma kişena. Dewleta tirk dewletêk hina wehşa û neyarê şarê kurdî ya. Neyarê Kurdistanê ya. Welatê bîn de hemberê neyaran çi tewir xoverdayiş beno, gera ma zî hemverê dewleta tirkî hina bikeri.
Nimûne Fîlîstîn o.
Fîlîstînijî qet û qet Îsraîlî ra eleqe nîvirazenê. Fîlîstînijî, esker û polîsê Îsraîlî ra nêdanî û nêgênî. Yane înan ra karê bazirganî nêkenî. Yew keye xo nêdano înan. Yew merheba nêdano înan. Yew tutê xo nîşiraweno mektebê înan. Yew Fîlîstînij nîşino nêbeno esker û polîsê înan. Yew Fîlîstînij nîşino nêbeno memûre dewleta Îsraîl. Yew Fîlîstînij hetê qiseyan zî bibo destek nêdano înan. Yew nîşino nêbeno endamê (aza) partîya înan. Kam hina bikero, yeno cezakerdiş.
La ma Kurdistanê de ewnênî şarê kurdî gore nê prensîban hereket keno? Ney. Hinayo ke ayê ke dewleta tirkî ra vanî, “dewleta dagirker” zî eleqe xo nêbirnenî. Hetta şinî dewleta tirkî ra memurî kenî. Eskerî kenî. Benî wezîfedarê dişmenî la reyna vanî, “Ma Kurdî”. Verê cû gera nê çîyan de raştkerdiş bibo. Gera eleqe yew Kurdî bi dewleta tirkî nêmano.Gera dewleta tirkî hina bibo ke, Kurdistanê de rût û zilût bimano.
Vernîyê peronê çîyan de gera yew tutê Kurdî nîşêro mektebe tirkî de nêwano. Nê prensîban ra pîya gera yew bi yew goreyê prensîbe têkoşînê zî hereketkerdiş bibo. Ayê prensîbê Kurdistana Azad yew bi yew hinayê.
1- Welatperwerî.
Welate ma Kurdistan o. Gera her Kurd, welatê xo û şarê xo ra hesbikero, wayîr bivejyo, Kurdistan terknêkero. Heme hetan ra sey kurdêk biciwîyo û kurdî qiseybikero. Qey (serva) welate xo şer (lej) bikero.
2- Fikre Kurdistane
Hetê fikir de gera herkes verê heme çîyan Kurd û Kurdistan ser bifikro. Pêro zengînîya Kurdistan bipawo. Pêro bawerî, lehçe û însanê welatê xo bipawo. Gera pêronê kurdî fikre dagirkeran red bikerenê. Bin tesîrê fikre dagirkeran de nêmanê.
3- Rêxistinbîyayîş û
rêxistinkerdiş
Welatperwerî û fikre Kurdistanê dima ra rêxistinkerdiş yeno. Gera yew Kurd zî rêxistinê dagirkeran(tirk, pers û ereb) de ca nêbo. Gera her kurd rêxistine xo de, yane Hereketê Azadî de ca bigero. Wexto ke pêronê şarê kurd hina rêxistin bibo, dinya bêro nêşkeno şarê kurdî.
4- Çalakî û têkoşîn
Welatperwerî, fikre Kurdistanê û rêxistinbîyayîş tenya bi sere xo zaf çi îfade nêkenî. Wexto ke çalakî û têkoşîn nêbo, pêro çî virt û veng o. Çunke dagirker bi netîceyê çalakî û têkoşîne Kurdistanê ra vejîyenî. Zobî zî ti rayîr çîna. Kam vano ez kurda, kurdbîyayîş nê merhaleyan ra şîyayîş ra beno.