Zekîya Altuna 87 serreyî ke dewa Sexte ya qezaya Farqînî ya Amedî de cuyena, 42 serrî verê mêrdeyê xo vînî kerde û o wext ra nata xebetîyena û domananê xo ra ewnîyena. Zekîya Altune bi 4 domananê xo binê bano kerpîcin de manena û hîna zî fek xebetîyayîşî ra veranêdaya. Babete ser o Zekîye Altune qisey kerde.
Altuna ke dewe de hetê her kesî ra yena şinasnayîş, her çiqas ke emrê aye pîl o zî baş asena. Altune dîyar kena ke roja ke mêrdeyê xo vînî kerda ra nata heme karê xo bi xo kena. Tamîrkerdişê keyeyê xo ra heta arêkerdişê tutun û xeleyî heme karan de xebetîyena. Altune wina va: “Mi domanê xo pîl kerdî û nika torinê mi estî. ”
Mi heme çî kerd
Altune va ‘seba ewnîyayîşê 4 domanan çi mi dest ra ame, mi kerd’ û wina dewam kerde: “Mi mast û hakî bi lingan berdêne merkezê qeza. Wexto ke cinîyan veng dayêne mi, ez şîyêne mi karê hêgayî zî kerdêne. Verê cû kesê xerîbî bi hawayo nêbaş mi ra ewnîyayênê. Mi koyan ra cehtire arê kerdêne û rotêne. Heta nika karêko mi nêkerd, nêmend. Ez na rewşe ver îftîxar kena û bextewar a. Çimkî mi domananê xo muhtacê ti kesî nêkerd. Domanê mi pîl bîyî, labelê mi fek xebetîyayîşî ra veranêdayo. Ez veng dana heme cinîyan, herinda ke keye de roşenî, wa debara xo bi xo bikerî.”
AMED