Dayîkê Aştîye yê Mexmûrî ke seba wedarnayîşê ambargoya ke Kampa Mexmûrî ser o esta, çalakîye de yî, çalakîya înan 20 rojî yo ke dewam kena. Dayîkî nuqtaya asayîşê PDKyî de çalakîya xo ya roniştişî domnenî. Hemsereka Şaredarîya Kampa Mexmûrî Leyla Arzû Îlhane Serekkomarê Îraqî Berham Salihî rê mektûbêk nuşte.
Îlhane mektûba xo de veng dayo Serekkomar Salihî û vato ‘nê rayîr û metodî verê cû ameyî ceribnayene’ û wina domnayo: “Ti zext, ambargo û tecrîd nêşêno şarî rayîrê ci ra bêro cîyakerdene. Çîyê ke vera kampe de yenî kerdene, ti cayê dinya de nêameyî dîyayene. Wexto ke DAÎŞî hêrişê Kerkûk, Şengal û Hewlêrî kerd, şarê kampe bi hawayo fedayî erdê Kurdîstanî pawit. Şarî zaf bedel da û ewro zî eynî qerardarîye esta.”
Mektûbe de ameyo vatene ke ewleyîya kampe binê berpirsîyarîya Îraq û Milletê Yewbîyayeyî de ya û wina dewam kerdo: “Hêrişanê hewayî yê dewleta Tirkî de heta nika 9 sîvîlî ameyî qetilkerdene û sîvîlan xeylê zirar dîyo. Ambargo ver nika hetê xida, awe û perwerdeyî de xeylê problemî estî. 2 dayîkê diganîyî domanê xo vînî kerdî û nêweşê bînî zî zehmetîyan ancenî. Şarê Mexmûrî şarêko îdeolojîk o û çîyanê winasîyan de tavîz nêdano. Ma dayîkî hêvî kenî ke ambargo bêro wedarnayene. Ma bawer kenî ke şima do no het de çîyo ke hewce keno, bikerî.”
ROJNEWS / SILÊMANÎ