Faşîzmê AKaPe na raye zî mebusê BDP xorê kerdî hedef. Çikê zulmê hukumatê tirkî yê verva kurdan hata stratejiyê xo yê nikayenî sernêkewt. Nika zulmê hebena keno giran hukumato tirk.
Naye ra avê 10hezar ra jede sîyasetvanî, rojnamevanî, wendekarî, serokê belediyan, domonî û xortî, 7 ra hata 70 însanê kurdî û dostê ci estî zîndanan.
Serekfaşîstî niyadake, bi na kerdene kurdî dawa xora nêtexelînê û teslîm nêbenê, na raye zî fermanê bêveng kerdena mebusanê kurdan da.
Mi naye ra avê çond dolimî vat bî, Tirkiye de demokrasî qeyta nêbiya û însano tirk demokrasî nasnêkeno. Hata nika her tim faşîzm bî Tirkiye de. Mordemî ke tarîxê komara tirkî de niyada, zaf zelal vîneno ke, tarîxê na dugele de her tim terteleyî biyê û dugele ebi zuran, dêkûdolavan û tertelan ama îdare kerdene.
Ma jede peyser nêşerîme.
Ronayena komara tirkî ra dima kurdî ameyî qirkerdene. Şex Seîd û hevalê xo ameyî qetil kerdene (1925).
Dima Tertelê Geliyê Zîlan bî 1930).
Na tertele ra dime Tertelê Dersîmî kewt rojdemê dewleta tirkî (1938).
1943 de Wan Ozalp de dewleta tirkî 33 kurdî qirkerdî.
Mavênê 6 û 7ê îlone 1955 Estemol de xiristiyanî ameyî qirkerdene.
Serranê 70 de gencê şoreşgerî ameyî dardekerdene.
Onca serranê 70 de bi Tertelê Maraş, tertelê alevîyan dest kerd ci, bi Çorum, Malatya û Sêvaz devan kerd.
Zerrê nî 30 serrranê peyenan de 50hezar ra jede kurdî ameyî qetil kerdene û na qetilkerdene hona ramena.
Des serranê peyenan de hukumatê AKaPe na herb ramit û kurdî qirkerdî.
Kes esto ke vazo, komara tirkî de demokrasî esta. Qeyta nêbiye. Hata ewro zî na dugele de serbestiya fikirî çîna, kurdî serbest niyê, alevî binê zordariya dewlete derê û her veng verva xo polîsê rejîme bi qaz vîneno. Namê na dugele endî biyo Qazîstan.
Keso ke vano, “na dugele de demokrasî esta” o letedê na rejîm o, hetkarê faşîzmê AKaPe wo o û gonî ra bara xo ceno.
Endi eskerawo ke, dewlet û hukumatê AKaPe verva BDP hetê siyasetî de sernêkewtê, nika wazenê BDP bi faşîzmê xo siyaset ra tever kere ke, Tirkiya faşîstan de qeyta jû muxalefet nêmano.
***
Endî beso! Nika tam waxt o: Sazî, dezge û rêxistinê ma gune endî tirkî weşiya xora vezê. Rojnamê ma gune pelganê tirkî kêmkerê, televziyonê ma programanê tirkî kêmkerê, siyasetvanê ma eskerakerdîsan bi zonanê kurdistanî bide.