Grûba xosere ya tîyatroyî ya bi nameye Tîyatro Araf eserê Gogolî yê bi nameyê Defterê Vîrardişî yê Deluyêkî lehçeya kurmancî de bi nameyê ‘Lênûska Bîranînên Dînekî’ kay kerde.
Grûba Tîyatro Arafî ke heta nika xeylê kayanê cîya-cîyayan peşkeş kerdbîy, yewna kay vejîyaye vernîya temaşekerdoxan. Seba ke tayînbîyayîşê qayûmî ra dima beşa kulturî ya Şaredarîya Bajarê Girdî ya Amedî ameybî padayîş û kaykerê şaredarîye zî sey alternatîfî Tîyatroyê Bajarî yê Amedî awan kerdbîy û heta nika xeylê kayî zî salona Tîyatroyê Bajarî de ameybî pêşkêşkerdiş.
Kayê Defterê Vîrardişî yê Deluyêkî Amed de 2 rojan pêsero ame kaykerdiş. Derhênerîya Hunerî ya Kayî hetê Murad Korkmazî ra, Derhênerîya Kurdî ya Kayî zî hetê Mihemed Porgebolî ra ame kerdiş. Kay raştê eleqeyêk ame û temaşekerdoxan kayî ra kêfêko gird girewt.
Kay hetê mîyaneyî de qala vîrardişanê deluyêkî kerdêne û ziwanê kayî zaf fesîh bî. Cok ra temaşekerdoxan bi kêfweşîyêka girde temaşe kerd. Kay de tena karakterê Poprîşçînî estbî û no karakter zî hetê kayker Tuncay Ozelî ra ame kaykerdiş.
Derhênerê Hunerî yê Kayî Murad Korkmazî babete ser o qisey kerd. Korkmazî qiseykerdişê xo de bale ant rewşa tîyatroyê kurdî ser û dîyar kerd ke ewro eleqeyo ke seba tîyatroyê kurdî yeno nawitiş baş nîyo û da zanayîş ke ganî no het de hîna zaf hewldayîşî bibî. Korkmazî dewamê qiseykerdişê xo de qala eleqeyêko seba kayî ame nîşandayîş zî kerd û va ‘seba ke daşinasnayîşê kayî bi hawayo baş nêame kerdiş, eleqe zaf nêbî, labelê ma bawer kenî ke do hîna baş bibo’.
Korkmazî qiseykerdişê xo de qala xebatanê xo yê bînan zî kerd û wina va: “Nika vernîya ma de kayo ke eserê Franz Kafkayî yê bi nameyê ‘Meymûnê Kafkayî’ esto û ma do hewl bidîy ê eserî bi hawayo kay pêşkêş bikerî.”
Kayê Defterê Vîrardişî yê Deluyêkî goreyê tarîxî 9ê êlule de Anqara de, 13 û 15ê êlule de zî Stenbol de bivejîyo temaşekerdoxan ver. Tîyatro Araf kam o?
Tîyatro Araf serra 2001 de qezaya Baykanî ya Sêrtî de cêrzemînêkê mektebêkî de dest bi xebatanê xo kerd. Dima ra Sêrt de bi desan kay, aktîvîte û xebatanê atolyeyî meşna. Tîyatro Araf 2009 de Êlih de dest pêkerd û o wext ra nata xebatanê xo Êlih de domneno. Na grûbe heta nika bi seyan kaykerî resnaye.
NAVENDA XEBERAN