Serra verva ma, asma adare de weçînîtîso mahallî esto. Waxtê weçînîtîs ke ame, demê herdiyayîş zî dest keno ci.

Vernamzetiye ra avê, herkes beno sa vano: “Ez zî namzetiya ken eskera. Demokrasiye na heqê dana herkesî, yê mi zî emegê mi esto, mi zî bedel do û wazen qomê xorê xizmete bikerî.”
Nî vatîşî mordemî rê wes yenê, zerrê mordemî kenê wes. Tabî, rast o, demokrasî na heqê dana herkesî. Kam ke wazeno, besekeno namzet bo. Eke namzetî hata peyniye demokrasiye rê îtîqatê xo biyarê, zaf rind beno. Gegane demokrasiye herçî halnêkena.
Gorê şert û mercan rayverê jû partiye besekenê derheqê namzetan de bi xo qerar bidê. Teyna Kurdistan û Tirkiye de niya niyo, pêro dugelanê dîna de nî meseleyî estê. Demokrasiye se ra se nîna hurêndî. Belka taye cayan de wastena qomî, weçînîtîsê qomî û yê îdarekaranê partiye jûvînî nêcenê. Wastena ma na wa ke demokrasiye se ra se bêro ca. La raştiya dîna zovîna ya.
Bi taybetiye Kurdîstan de demê weçînîtîs de xêle însanê ma partî û rêxistina xora heredînê. Çike ma de kulturê qencekerdene û vîndkerdena jû weçînîtîsî hona tam ronênîşto.
Weçînîtîs jû têverestîs o. Hewnê mordemî bi raştiye ra jûvînî nêcenê. Na semed ra mordem gune sabiyayene û mirozinenî rê amade bo. Teyna sabiyayene nêbena. Mordem şîkîno mirozin bo, hama qom û rêxistina xora gune meherdiyo.
Raya weşiye vîndkerdene û qezenckerdene ra vêrena ra. Kam ke waronêgina û ranêwist, o sernêkuno.
Mesela emegî: Tabî Hereketê Serbestiya Kurdan de kamo ke hata na roze wertê na hereket dero, emegê xo esto. Herkesê zerrê na hereketî gorê xo emeg do. No emeg amo pêser, no hereketo şêligî vejiyo werte. Kamî çiqas emeg do, naye nêşîkîme bipêmîme. Senik ya zî jede herkesî gorê xo karê kerdo, hereket ardo na roze.
Mesela bedelî: Îta de mordem gune dîqqet bikero. Jûyî ke vat: “Mi honde bedel do, namzetiya mi gune bêro qebul kerdene!” gune bizono ke kesê bînî eyra jede bedel do. Kurdistan de zaf malbatan seweta serbestiya kurdan 7,8 şehîdî dê. Coka mordem argumananê xo yê namzetiye gune rind bisenco.
Yê kam ke na têverestîs de vindkerdene rê texamûlê xo çîno, heval û hogiranê xora heredîno, o gune namzetiye ra dûrî vindo. Hama keso ke wazeno na têverestîs de ca bijero, bara xo bibo, qampanya weçînîtîşî gurezin kero, qomê xorê xizmete bikero, vîndkerdene û serkewtene rê amade yo, raya ey zî rakerde bo!
Û kesoke rîwalê weçînîts ra heredîno, o emegê xo roseno, bedelê xorê xiyanet keno!