Demîrtaş: ‘Şar Erdogan û AKP ra eciz bîyo û êdî bedilîyayîşan wazeno’ û wina domna: “Azadîya şaran azadîya mi ra muhîmêr a. Eke ez bizanba ke ez do heta peynîya emrê xo zîndan de bimana, reyna zî ez fek têkoşînê aştî û azadîye ra veranêdana.” Weçînayîşê 24ê Hezîrane rê 18 rojî mendî û her ke weçînayîş nizdî beno, xebatê partîyan zî hîra beno û ver bi peynî şono. Namzedanê Serekkomarîye ra Selahatttîn Demîrtaş zîndan de tewqîfkerde yo û hewl dano mesajanê xo bi rayîrê avûkat û pêvînayîşan biresno şarî. Demîrtaşî bi rayîrê avûkatanê xo cewab da persanê kovara Der Spîegelî ya Almanya. Demîrtaşî vato ‘mi qet fek têkoşîn ra veranêdayo’ û wina dewam kerdo: “Kura de lazimîye bi mi bibo, ez do xizmetê şar û partîya xo bikera. Nika zî mi ra no xizmet ame waştiş û ez zî amade ya.” Demîrtaşî derheqê xoresnayîşê şarî de dîyar kerdo ke o eşkeno bi rayîrê mesaj û mektûban vatişê xo vajo, labelê ser nameyê ci bi mîlyonan cinî û ciwanî do keye bi keye bigêrî. Demîrtaşî wina domnayo: “No het de bawerîya mi bi şarê ma esta. Xora na kampanya seba mi nîya, seba şaran a û seba azadî û demokrasî yena domnayîş. Ewro ser partîya mi de zextêko faşîzan esto, labelê şarê ma cesur û bimoral o. Ma do nê probleman derbaz bikerî û bikewî weçînayîş. Şar Erdogan û AKP ra eciz bîyo û êdî bedilîyayîşan wazeno. Şar do no weçînayîş de Erdogan ra vajo; edî bes o.” Ez qet fek tira veranêdana Demîrtaşî qiseykerdişê xo de bale ant ser bêçaretîya îqtîdarî ser û cewab da persê ‘goreyê şima heta ke Erdogan îqtîdar de bo, şima bawer kenî ke do zîndan ra bivejî?’ û wina va: “Azadîya şarî azadîya mi ra muhîmêr a. Eke şar azadîye qezenç bikero, tewqîfbîyayîşê mi zî qedîyeno. Seba ma mesele şexsî nîya, komelkî ya. Huqûqî nê, sîyasî ya. Eke ez bizanba ke ez do heta peynîya emrê xo zîndan de ba, reyna zî ez fek têkoşînê aştî û azadîye ra veranêdana.” Demîrtaşî vera persê ‘gelo îxtîmalê destpêkerdişê prosesê çareserîye û sewbîna esto?’ de vînayîşê xo ard ziwan. Demîrtaşî qiseykerdişê xo wina qedêna: “Ma do bi xo bêrî îqtîdar û problemê kurdî zî tede problemanê bînan çarçewaya demokrasî de çareser bikerî. AKP ra hêvîyêka ma ya şenike daxî çin a. AKP êdî nîjadperest o û temsîlkarê zîhnîyetê faşîstî yo.” Reyna kewtî pey hesabanê şaşan Hemserekê Pêroyî yê HDPyî Sezaî Temellî zî Êlih de xîtabê şarî kerd. Bi deshezaran kesî Temellîyî goşdarî kerdî. Qiseykerdişê xo de va ‘ma do Êlih de 5 parlamenteran bivejî’ û wina domna: “Ma do pêro pîya problemanê nê welatî çareser bikerî. Ma do heme çîyî ra ver 24ê Hezîrane de faşîzmê Erdoganî bierzî warê çopgehî. Ma do embazanê xo zîndanan ra bivejî û destûr nêdî kesê ke hewl danî şaran bikerî dişmenê yewbînan. Weçînayîş ra ver vengdayîşê şerî kenî û problemê kurdî înkar kenî û cenazeyan ra menfîet pawenî. Reyna 5ê Nîsana 2015î ra nata tecrîdî domnenî. Ma do tecrîdî biqedênî, çimkî tecrîd yeno manaya şerî. Ma do erjanê xo vîrî nêkerî û hesabê hemînan pers bikerî.” MERKEZÊ XEBERAN