Hemserekê Pêroyî yê HDPyî Selahattîn Demîrtaş ke bi 9 embazanê xo rehîn girotîya û nika Hepisxaneyê Edîrne yê Tîpa E de maneno, derheqê rewşa parlamenteran de bi faks pêşnîyazê persan erşawite Serekîya Meclîsî.
Pêşnîyazê persan ke Demîrtaşî erşawite Serekîya Meclîsî, wina yo:
* 10 parlamenterê ke endamê Meclîsî yî û bê qerarê meclîsî ameybî tewqîfkerdiş; şima do derheqê tewqîfkerdişê înan de çîyêk bikerî an nê?
* Parlamenterê ke ameyî tewqîfkerdiş nika hucreyanê tîpê Fyan de bin tecrîdî de yenî vindarnayîş. Şima derheqê nêyî de çîyêk bikerî an nê?
* Her çiqas ke hema zî destpirnêginayîya parlamenteran domîyena zî, no pêşnîyazê persan zî tede heme nuşteyê ma bin denetîmî de yî. Şima nêyî goreyê nîzamnameyê Meclîsî û Qanûno bingeyî munasîb vînenî an nê?
* Tewqîfkerdişê parlamenteran yeno manaya hêrişkerdişê rêzdarîya Meclîsî zî. Goreyê şima vera nê hêrişan de bêvengmendiş, parlamento û sîyasetê parlamenterî orte wedarneno an nê?
* Her çiqas ke hîna mehkemeyê ma dest pênêkerdî zî Verfekê hukmatî, Serekwezîr û Serekomar bi vatişanê xo mehkeme ser o tesîr viraştî. Şima do derheqê heqê mehkemebîyîşê adil de tedbîran bigîrî an nê?
* Şima do şert û mercê hepisxaneyê ke 10 parlamenterî tede yenî vindarnayîş de cigêrayîş bikerî an nê?
ENQERA