Ça hen niyo?
Tarva 80 de qeke nê, rast, çep herkes amenê guretene, cirê ejat biyenê û darde biyenê.
Na dem de teyna kurdî û dostê xo cerînê zerre, bê mahkeme û bê sevev bi serran hepisxanan de yenê guretene.
Waxtoke teqetê faşîzmê AKaPe erzenê dezge û çeyanê kurdan ser, cira sevev nêvanê.
Teyna vanê, sima îddîaname ra musenê, mahkeme de vînenê…..
Bîlasevev însanê ma hepisxanan de poynenê.
Na îlerî demokrasî niya, no îlerî faşîzm o.
Wendoxu rê onca ebi jû hekate numune bidî. Bidî ke na hal hebena zelal bo.
Rozê awrês xorê binê birrî de antoqê xo de merediyo ra, oroşîno ra.
Xafilde karrûkurriye werte nana pêra.
Awrês antoq ra sarê xo ano tever, niyadano ke cer ra ha wa jû luye karrena kurrena, helke helke xo ya yena.
Luye ke yena nejdî, awrês perskeno vano: Wakila mi se biyo, ça biyo helke helka to, ver û pey ra helm cena, xêr a?
Luye dot ra cerena ra ci vana: Bira, bira qe pers meke, pasayî ferman do qulê xo, vato nêweşiya mi esta herzî cirê derman yê. Şerê mirê herzu biyarê. Mordemê pasayî biyê vila, kam ke dî, kisenê, herzunê ey zî pasayî rê benê.
Awrês vano: Hewww ma wakila mi herzê to çînê ke, ti ça xorê honde ejat kena, karrena kurrena, helm to de nêmendo. Ez gune qisawete bikerî, ma torê se beno?
Luye vana: Bira, bira qe mevaze, verecoy kisenê dima niyadanê ala herzê xo estê çînê. Coka ez remen ke, mi mekisê.
Îlerî demokrasiya AKaPe hebe biya na fêndî.
Miletî danê are kenê zerre, ebi seran hepis de verdanê, dima qerar danê.
Na mavên de çê kamî bîyo xirave, kamî çi kerdo vîndî, bîrûbazarê îlerî demokratan de niyo.
Zulmê anaqarayizî tewa nasnêkeno. Kam hereketê siyasî yê kurdan dero, ya zî nejdiye na hereketî dero cerîno zerre.
Tuncer Bakirhanî cenê zerre, çike protokolê diyayîsê Ocalanî wendê.
Rojnamevanî cerînê zerre, çike xeberî virastê.
Çê mebusa kurde Leyla Zana kenê saye, çike Leyla qesey kena û raştiye vana.
Çê Orhan Doxanî kene saye.
Evrîm Alataş kene saye.
Rejîma AKaPe mordemê ke tertelê Roboskî ra dirvetin xeleşiyê, dana mahkeme. Hama qetilkaran rê berxûdariye vana.
Ha sima rê îlerî demokrasiya AKaPe!
Ha sima rê îlerî faşîzmê AKaPe!