Karsaz Alaaddîn Kilıç o ke hetkarîyêka pîl dabi Mîhrîcanê Depî hetê komîteya hedrakardox a mîhrîcanî rê pê belgeyê spasname ame xelakerdiş. Kiliçî îzeh kerd ke semedo ke ameyo xelakerdiş zaf kêfweş o û wina vat: “Ma zî mîyanê xebata hedrebîyayîşê mîhrîcanî de ca girot. Ma Amed de semedê mîhrîcanî hem hetê maddî hem zî hetê manevî de hatkarîya şar û sazîyanê sîvîlan girot. Mîhrîcanê Depî feydeyêko weş da kulturê têkoşîna kurdan. Ma peynîya xebata xo de semedê mîhrîcanî tîşort, kilaw, flama û mazemeyê bînî peyda kerdî. Beşdarbîyayîşê mîhrîcanî zaf zêde bi. Mîhrîcano ke nameyê Mazlum Doganî ser o virazîya 3 roje dewam kerde. No mîhrîcan semedê kurdan ameyêne vateyê yewbîyayîş / yewcaameyîşî. No dem de lazimo kurdî yewitîya xo awan bikerê. Semedê merdimêk nan û awe senî ke lazim ê yewitî zî hendê lazim a. Lazimo heme kurdî xeta Mazlum Doganî de bêrê yewca. Sibaroj sere de Çewlîg de M. Hayrî Durmuş pêroyî de heme cayanê Kurdistanî de lazimo semedê ney qehremanan mîhrîcanî bêrê viraştiş.”
Ruhê xoverodayîşî
Kiliçî dewamê qiseykerdişê xo de eleqe ant qehremanê ke xeta Çewlîg de vejîyayê ser o înan ra Mazlum Dogan, M. Hayrî Durmuş û Mehmet Karasungurî ser o û wîna vat: “Ma gere ney nameyan baş nas bikerê. Nê şexsîyetî semedê şarê xo bêtereddut ganê xo dayê. Naye ra xususî semedê Mazlum Doganî mîhrîcan viraştiş meseleyêka zaf muhîm a. sen ma zanê dewlete bistratejîk cayê ke elewî tede cuyenê oca de CHP û cayê ke kurdê sunnî tede cuyenê de zî AKP eşta dewre. Na plane xususî Çewlîg, Xarpêt û Dêrsim ser o dewre de ya. Wazenê kurdê zazayan mehkumê nê her di xetê serdestan bikerê. Xeta bîne zî xeta tevgêra azadî ya. Xeta tevgêra azadî şar û qiymetanê şarî esas gêna. Xeta en raşteqîn xeta tevgêra azadî ya. Mazlum Dogan zî rayverêkê a xete yo. Coka wayîrvejîyayê nê şexsan şarî ra malkerdiş meseleyêka zaf muhîm a. eke ma heme na xete de xo organîze bikere stratejîya dewlete puç vejîyena. Seke yeno zanayîş serra 1982 de dewrê derbeyo Faşît de şarê Çewlîgî mekaqanûnê derbeyî ra vatibi ney. O ruhê xoveradayîşî tevgêra azadî temsîl kena. Eke ma ked bide û xebat bikere ma eşkenê azadîya xo û şarê xo qezenç bikere.” Kiliçî peynî de veng da şarê Çewlîg û Xarpêt û waşt wa pê xet û ruhê Mazlum Dogan, Mehmet karasungur û Hayrî durmuş xo weçînayîşê 7’ê Hezîrane rê hedre bikerê û seltenatê serdestan bişiknê.
ENWER YILMAZ/AMED