ARJÎN DÎLEK ONCEL / MA/RIHA
Tirkîya de roje çin a ke hetê huqûqî de ecêbîyêk nêro cuyayîş. Nînan ra yewe zî îdîanameyo ke derheqê Îsa Kurtayo ke 10ê temmuze ra nata tewqîfkerde yo de ameyo amadekerdiş o. Îdîanameyê Kurtayî de vatişê sîyasetmedar, şaîr û wezîran sey delîlê sucî ameyî dîyayîş.
16ê teşrîna verêne de roniştişo 2. yê doza Kurtayî ame dîyayîş û qerarê domîyayîşê tewqîfbîyayîşê ci amebî dayîş. Babete ser o avûkatê Kurtayî Hasan Kiliçî qisey kerd.
Kiliçî va ‘çîyê ke îdîaname de sey delîlî ameyî dîyayîş, komîk û ecêb î’ û wina dewam kerd: “Dosya de vatişê Serekê Urugayî yo kehen ke vatbî ‘xora her keso ke seba azadîye şer keno rê vanî terorîst’, vatişê Azîz Nesînî yê ‘ma seba rojê ke ma do nêvînî şer kerd, cok ra lejê ma beno şîîre’, vatişê Cemal Sureyyayî yê ‘Roja ke azadî bêra, aye roje merg qedexe yo’û vatişê Yilmaz Guney û Ernesto Che Gueverayî zî sey delîlê sucî ameyî nîşandayîş. Reyna fotografo ke Ahmet Kayayî nîşanê serkewtişî kerdo, şîîra ‘bulaşici cesaret’ yê Ataol Behramogluyî ke Selahattîn Demîrtaşî vatbî zî suc hesibîyayî. Hetta nuşteyê ke bi kurdî ‘Roja dayîkan pîroz bo’ û ‘ez to ra hes kena’ zî suc hesîbîyayî.”
Alfabe kerdî şîfreyê çalakîye
Kiliçî dewamê qiseykerdişê xo de wina va: “Wina aseno ke waştişname û pawitişo ke ma mehkemeyan de kenî, nînî goşdarîkerdiş. Heto bîn ra mehkemeye alfabeya kurdî zî dekerdo mîyanê dosya. Îdîaname de alfabe sey şîfreyê programê çalakîyan ameyo hesibnayîş. Êdî bawerîya ti kesan bi huqûqî rê nêmendo. Tirkîya de proseso ke huqûq ameyo wedarnayîş yeno cuyayîş.”