Tayî kurdî estî, înan zaf derbe dîyî. La teslîme derbe nêbîyî. Reyna tayî derbe estî sey derbeya eskerî nêyenî dîyayîş. La derbe eskerî ra hîna tehlukeyî yê. Yew nê derbeyan ra Derbeya Eskerî yê 12 Êlul 1980 û Derbeya AKP yê 20ê Temmuze 2016’î ya. Derbeya AKP yê 20ê Temmuzî hîna xiraba.
Derbe Eskerî yê 12 Êlule de bi taybet Kurdistanê de hendayî komel û weqfê nêameyê girewtiş. Hendayî însanî nêameybî girewtiş û tepiştiş. Hendayî însanî karî ra nêameybî eştiş. Hendayî zulm û zordarî çinêbî. Hendayî bêbawerî, hendayî ajantî çinibî. Hendayî rojnameger û nuştox nêameybî tepiştiş. Hemberê şarê kurdî hendayî dişmenê nêbibî.
Nika AKP, 20ê Temmuz 2016 de derbe viraşt. Rewşê awerte beyan kerd. Derbe ra dima, 100 hezar zêdayîr kurdî karî ra vet. Bi 10 hezaran kurdî eştî zîndanan. Mektebê kurdî, baxçe qijan qefilna. Qiseyê kurdî qedexe kerdî. Çi komele kurdî estî hema hema hemeyê înan qefilna. Çi TV û rojnameyê kurdan estî, qefilna û dest na ser. Çi sermaye şarê kurdî esto dest na ser. Kiştişê qij û pîlê kurdî verê kamerayan de beno.
Nayî bes nêdîyî, meclîsê xo de çend qanûnî vetî. Goreyê nê qanûnan parlementê ke qalê Kurd û Kurdistanê bikerenê yenî cezakerdiş. Yanê AKP hina tirkperêstî kena ke, wazena ser rîyê erdî de bi nameyê Kurd û Kurdistanî çîyêk zî nêverdo. Nê çîyan AKP-MHP pîya kenî. AKP bîya MHP, MHP bîya AKP. Hurdî zî şirîke yewbîn ê. Hîzbulkontra Hudapar û Ergenekoncî zî dayê kiştê xo dişmenîyê kurdan kenî.
AKP-MHP-Hîzbulkontra Hûdapar û Ergenekoncî, her roj bi desan kurdan tepişenî erzenî zîndanan. Înan ra yew zî Musa Farîsoglu yo. Tekoşînê şarê kurdî de yew edet esto, sey prensîbe sereke yo. Wexto ke yew biciwîyo, ser başîyê eyê çîyêk nîyeno vatiş û nuştiş. Çîyo hina şerm yeno dîyayîş. La ez wazena reyna bikewrî teberê nê prensîbî. Ser Musa Farîsoglu çend çîyan binusî.
Wexto ke mi no nuşti nuştenê, Musa Farîsoglu hema zî binçiman de bi. Aqubetê eyê belî nêbi. Ez reyna ser Musa Farîsoglu çend çîyan binusî. Wexto ke Derbeya Eskerî yê 12 Êlule 1980 bîyê, mi Amed de Lîseya Zîya Gokalpî de beşa mîyanîn de wendenê. O çaxî mamosteyê ma yê almanî zî Musa Farîsoglu bî. O çaxî tersê derbeya eskerî ra yew mamoste û yew kurdî ser Kurd û Kurdistanî qalêk nêkerdenê. Ser kamî qerarê binçimkerdiş û tepiştîş bibi, hema hema pêronê înan remenê şîyênê Ewropa. La PKK’yî qey şerêk newe Kurdistanê de bidenê destpêkerdiş, şîyenê Rojavayê Kurdistan û Lubnanî. Wextê ke hina Musa Farîsoglu nêşi cayêk zî. ZGL de mamostayî kerdenê. Dersa ma ya almanî eyê day. Ma nêzdîyê 15 kesan dersa almanî dîyenê. Mîyanê ma de yew keyna zî bibî. Goreye ke yeno vîra mi ma hefte de hîrê saetî dersa almanî dîyenê. Musa Farîsoglu di saetî dersa almanî danê. Dima ra vatenê beso.Rojêk wexto ke dersa almanî da qedênayîş, a hevala ma keyna şî keye xo. La Musa Farîsoglu ma lajî vindarnayî, ma ra vat ke a keyna ra bawerî nêbeno. Wa a şêro keye xo. La ez tîya ra pê yew saet ser tarîxê Kurd û Kurdistanê ders dana şima. Tam serrêk hina Musa Farîsoglu hefte de yew saet dersa tarîxe Kurd û Kurdistanê da ma. O çaxî herkes ver derbeya eskerî lerzenê, yew qise nêkerdenê û Kurdistan terkerdenê û remenê, şîyenê Ewropa, la Musa Farîsoglu zî bêters hereket kerdenê. Musa Farîsoglu yew camerde hina yo. AKP, serrekîya derbe kerda, yew bi yew kurdan tepişena erzana zîndanan. Wazena Musa Farîsoglu zî berzo zîndanî.
Ez Musa Farîsoglu hol şinaşnena, senî ke hemberê Derbeya Eskerî yê 12 Êlule de sereyê xo nizm nêkerd û teslîm nêbi, dawaya Kurd û Kurdistanî ra fek veranêda, do hemberê Derbeya AKP yê 20ê Temmuzî de zî hina bikero.