Goreyê rayedaranê AKP’î ra no derbe karê cemaetî yo. Na derbeya peyîne ke bi zehf awayê xo hema zî nuqtayê aye yê ximamî (muxlaq) estê leze amî tefnayîşî. La bi raştî heta şarê tirkî şarê kurdî fam nêkero û paştî nêdo têkoşîna înan a ke semedê têduştî û demokrasîya şaran danê ko xetereyê newînî verdewam bikerê.
Dimayê na derbeye fekê kam rayadar yan zî pêgiroteyê partîya desthilate beno a vanê ‘na derbeye hemverê demokrasîya Tirkîya amîya viraştişî, lazim o heme şarê Tirkiye wayîr ro na demokrasî vecîyo.’ Halbûkî hem rayapêroyî hem zî ay tenê ke nê vatişî vanê bi xo zî zanê ke dewletê ke wayîrê têduştîya şaran û demokrasîye yê derbeyî înan de nêvirazênê. Wa banîrê tarîxe derbeyanê ke dinya de ameyê kerdişî ra, ko bivînê ke hemine de zî rayveberîyêka desthilat û dîktatorî bîya. Di mudaxileyê na derbeye de çend rewşê balantayey ameyî dîtişî. Yew tera heme camîyan de wendişê sellayan bi ke bi saetan verdewam kerdêne. Rewşêke bîn zî welatîyê ke bi vengdayîşê AKPî vecyabî kuçeyan bî. Nê welatîyanê ke lazim bi bertekê xo bi demokrasî ramotêne, tam bi awayê derbekaran tê geyrayne. Hemine tekbîrî ardêne û destê înan de çuwa û sîlehî bî. Heta çend cayan de eskerê xo lînç kerdî, heta înan ra yew ame serrebirrnayîşî. Bi raştî merdim fikiryayne vatêne “gelo qey xeyrîmislîman înan ser de giroto û ey hemverê înan tekbîran anê?” La ayêke hemverê înan bî miletê înan ra bî, yanê mehmetçîkê înan bî ke wexta qalê înan kerdêne awa deran vindertêne. Helbete lazim o ke welatî hemverê derbeyan bertekê xo ramojnê. Heta ne tenê hemverê derbekaran, lazim o hemverê heme kerdişanê antîdemokratîkî ke şaranê teberê tirkan ser de yenê kerdişî zî vecîyê.
Nê welatîyêke vecîyabî teber gere wexta ke rayveberanê na dewlete derbeyêke bê emane bi aşman şarê ma yê Cizîr, Colemêrg, Nisêbîn, Sûr û cay bînan ser de pêk ard de zî bivecyayne teber û bertekê xo yê waştişê têduştîya şaran û demokrasî bimoştêne ra. La çi heyf ke şarê kurdî tenê mend û bi xoverdayîşêke bêemsal hemverê zilmê derbekaran xo pay ra verda. Şarê kurdî verî zî vendayne şarê tirkî ke hemverê kerdişanê rayveberan ê antîdemokratîkan vecîyê ke aştî û aramî bêro na axe ser û heme şarî pêdir bi aştî bicuwî, eyro ancî venydeno înan ke hemverê heme awayî derbekaran têkoşîna demokrasîya şaran bidê û rayîro ke şarê kurdî dayo xo ver ey zî bidê xo ver ke rayêke bîne desthilatî, dîktator û qiwetê hegemonîkî serê na axe de nicuwê.
Nesrîn Navdar