ERSÎN OZGUL / H. YAŞAR SEZGÎN
PÎRHA / DÊRSIM
Derhêner Caner Canerîko ke bi belgefîlmanê xo yê Dêrsimî ser o yeno nas kerdene, seba projeya xo ya neweyî xebatanê xo domneno. Derhêner Canerîk seba ke mesrefê projeya xo ya neweyî ya bi nameyê ‘Kamîlê Dêrsimî’ vejo, Pîlemurîye de karê hingdarîye keno.
Canerîkî qala projeya xo ya neweyî û karê hingdarîye ser o qisey kerd. Canerîkî va ‘ez nika bi projeya xo ya neweyî hewl dana merdimanê 80 serreyî ra pîlêran reyde kulturê Dêrsimî ser o pêvînayîşan bikera’ û wina dewam kerd: “Ez wazema çîyê ke ez pîlan ra musena, neqlê neslanê bînan bikera. Armancê mi no yo. Labelê domnayîşê na projeye zaf mesrefin o. Ma ge-ge raştê astengîyan zî yenî. Heta nika mi 75 estanikî arê dayî. Mi 50ê ci rast kerdî. Seba çapkerdişî mesref zaf o, ez hingdarîye kena. ”
Derhêner Canerîkî va ‘ez seba ke mesrefê kitabê xo veja, karê hingdarîye kena’ û wina domna: “Reyna karê hingdarîye de şima mecbûr nîyî karî ser o bivinderî. Tebîetê Dêrsimî nê karî rê munasîb o û tewirê nebatan zêde yo. Emser no kar zaf baş derbaz nêbi. Ez wazena hingo bikalîte xelq bikera. Seba ke merdiman verê cû hingo şekerin roto, nika no het de problemê îmajî esto. Wedarnayîşê nê problemî zehmet o. Şarê ma musayo hingo erjan herîneno. Ez wazena mi dima kitab û senaryoyêka başe ya fîlmêkî bimanî bes o. Ez wazena bi temamî mîyanê tebîetî de bicuya. Dêrsim de kerra tena kerra nîya. Kerra, awe, verge, mîlçike, heş û sewbîna pîroz î. Dêrsim seba ma cayêko taybet o.”