Derheqê Engîn Eroglûyî yo ke qeraxê Munzurî yê Dêrsimî de, roja 15ê Hezîrane de gama ke heywanê xo çerênayêne reyêk de werte ra bibi vînî, îdîayêka balkêşe ameye kerdene. Eroglûyo ke Dêrsim de bayîyêka GSM’yî de karker bi, peynîya hewteyî de şi dewa Yaylagunu ya Pulurî ke heywananê keyeyê xo biçerêno.
Labelê dimayo ke şan de nêagêra keye, pîya bi dewijan keyeyê Eroglûyî seba vînayîşê lajê xo ê dormeyî de gêrayî û qeraxê Munzurî de telefonê destî, şewqa û şopa gonî dîyî. Bi îhtîmalo ke Eroglû ameyo remnayene cade xebere dîyaye cendirmeyan. Rixmo ke pîya bi tewrbîyayîşê ekîpanê AFADî xebatê cigêrayîşî ame kerdene zî heta nika nêresayî Eroglûyî, labelê qewimîyayîşêko newe derheqê ê de virazîya.
Raywanêk ke fotografê manzara yê Munzurî antbi û otobuse de raywanî kerdêne xebera vînîbîyayîşê Eroglûyî ra dima ferq kerd ke mîyanê fotografanê ê de Eroglû zî esto. Raywanî îdîa kerd ke berê bagaja otobusa înan xeripnaye bîyo û her game şofor peya bîyo û reyna padayo. Raywanî vat beno ke berê bagaje akerde mendo û ginayo Eroglûyî ro. Naye ser o keyeyê Eroglûyî pîya bi ê dîmenan muracatê dozgerîye kerd. Pîya bi raywano ke dîmenê Eroglûyî ê dir estbî, şoforê otobuse vizêr şan de Stenbol de ameyî destbendkerdene û ameyî berdene bi Mudirîya Asayîşê Bajarî. Ame zanayene ke şoforî îfadeyê xo de vato ke ê Eroglû qe nêdîyo û do derheqê îdîayan de tu çîyêk nêvajo.
Birayê Eroglûyî Mesût Eroglûyî dîyar kerd ke tu problemêkê birayê ci yewî dir çin o, birayê ci hetê her kesî ra ameyêne heskerdene. Eroglûyî da zanayene rixmê cigêrayîşê 3 rojan de hewna netîceyêk nêameyo girewtene û ganî selahîyetdarî hîna hesas bibê. Eroglûyî wina va: “Îhtîmalê piroginayîşê berê wesayîtî zêde yo, labelê şoforê otobuse îdîa keno ke ê birayê mi qe nêdîyo. Naye ra derheqê qewimîyayîşî de hewna hayîdarîyêka zelale çin a.”
MA / DÊRSIM