Dersim de demê peynî de noqteyê qontrolî yê bi barîyeranê betonî û qûmî virazîyenê zêdîyenê. Enê noqteyanê polîs û leşkerî ke bi barîyeranê betonî virazîyayî de, welatijî bi seatan yenê vindernayiş. Herzewbîn rîwalê ablûqeya lejkerî heta nika xêlê kes bî hedefê hêrişan û weşîya xo kerdî vinî.
Welatijê ke Xarpêt ra şinê Dersim dekewtişê Kovancilar, ser Pirdê Seyîtlî ke nezdîye sûkeka Perî yo û herêma Aktûlûk de pêro pîya 3 noqteyan de qontrolê ‘Tedbîrê tîvarî’ ronîyayê. Qasê 100 metre vernîya noqteyan bi barîyeranê betonî amey girotiş. Noqteyê geyrayişî ke serê înan ameyo girotiş, noqteyanê qeyrayişî ra vêşêr çarnîyayî qereqolan.
Rîwalê GBT welatijî bi seatan vindarnîyenê
Onca welatijê ke Xarpêt ra ser qezaya Pêrtagî ra yenê zî, demo ke bi ferîbotî ravêrîyenê raştê noqteya qontrolî yenê. Noqteya qontrolî ke bi xêlê wesayîtanê zirxî ameya çormêgirewtiş, wesayîtanê ferîbotî de yenê vindernayen, bexajê înan yenê qontrolkerdiş û her zewbîn welatijî raştê qontrolê GBT yenê.
Sûk de tewr jêde kî qezaya Pilur tedbîranê tîvarîye ra tesîr bena. Dekewtişê qeza de rayîra ke 40 deqe gêna de, welatijî 50 deqe noqteyanê qontrolî de yenê vindernayen.
40 rojî rayirî girewtî
Pilur de bi behaneyê operasyon û tîvarî 40 rojan şîyayiş û ameyişî rê amê girotiş. Herzewbîn qeza de şebekeyê înternet û telefonê bi zanabîyayiş amey birnayen. Hêrişa bombeyî ya dûştê lojmananê polîsan ra dima quwetê dewlet zey ke qomî ceza bikerê, vernîya her çêyeyî de qûm rijnayî û rayî girewtîye. Welatijê ke bi huweyan qûmî ver çêyeyê xo ra eştî de zî xêlê noqteyê bi barîyeranê betonî ronîyay. Wendekarê zangehî zî bin nameyê ‘Tedbîranê tîvarîye’ de kirêşîyay zangehê merkezê Dersim.
Qezaya bîn yê Dersim Qisle de zî rayîra welatijê ke şî Kûtûdere dekewtişê qeza de birnîya. Leşkerê ke ver qereqolî de welatijan vindarnay û waştî ke wesayîtanê xo ra vejerê û baxajê xo akerê. Wextê akerdişî de zî destê lejkeran ser têtik o û raşte raşt welatijan hedef gênê.
Ambargoyê xida
Qezayanê Dersim Xozat û Çemîşgezek de zî eynî kerdişî ferz benê. Noqteyanê qontrolî yê ke rayîrê Dola Pilemûriye û qezaya Pilemûriye de ronîyay ra berdişê xida zî tomet o. Dewijê Pilemûriye ke wexto ke seba hewcedarîyanê xo yê serrane şinê Erzîngan, ageyrayişî de xêlê reynî raştê ambargoyê xida yenê. Xêlê welatijê ke 3 aşmî reynî seba dayîş û girewtişî şî Erzîngan rê zî bi behaneyê ‘Yardimdayişê rêxistin’ ceza birnîya.
Sutluce de zî hemverê Keyeyê Cemî de zî noqteya geyrayişî ronîya û lejkerê ke tîya de bica bîye hûmara ci lejkeranê qereqolî ra vêşêr a.
Tedbîrê tîvarî bî sebebê merdişê sivîlan
Hewldayena derbe ya 15ê Temûz ra dima, bi îlankerdişê OHALî ra pîya 4 welatijî sûk de kişîyay.
Mesût Îlkbahar o ke 22 serre bi 1ê Tebaxe de wexto ke dewa Pakîre yê Xozatî ra seba îmzeyî pîyê xo berd qereqolî raştê gulerijnayenî ame û weşîya xo kerd vinî. Dola Mûnzûrî de bombevornayenê 9ê Tebaxe ra dima rayîra Pilur şîyayiş û ameyişê wesayîtan ra girotîya û gurekarê bi nameyê Şukru Abay ke bi zorî seba arizeya elektrîka fîberê ame rişnayen, guleyeke îsabetê ey kerd û weşîya xo kerd vinî.
Onca 6ê Îlone de wesayîta zirxî ya lejkerî Meydanê Seyîd Rizayî de cenîya bi nameyê Nacîye Ozdemîr a 71 serrî pelçiqna. Lejkerê ke 20ê Îlone de seba operasyonî şî Dola Mûnzûrî, mînîbusek gulevaran kerdî û şoforê mînîbusî Ersîn Demîr ê 28 serreyî kiştî.
Herêma Amûtka yê Xozatî de 3 welatijê ke 9ê Îlone de wexto ke bi wesayîtî seweta îxaleyê darcikerdişî şî birrî teqînayişeke qewimya. Teqînayişî ra 3 rojî dima cenazeyê 1 welatijî hetê quwetanê dewlet amê wedarnayiş, la hona zî aqûbetê 2 cenazeyanê bînî nîna zonayiş.
Her ca tomet o
Dersim de rîwalê ‘Polîtîkayanê tîvarî’ xêlê heremê sûkî tomet ê. 2 serranê peynî de bi behaneyanê kêfî xêlê heremî seba 15 rojan, 30 rojan, 6 aşman yenê tometkerdiş. Nika zî qezayanê sûk de bi desan heremî tomet ê. No durum welatijan her hetî ra mexdûr keno. Çarçoveyê nê qedexeyan de xêlê jîyarî, cayê tarîqî û geyrayişî zî tomet ê.
Herzewbîn rîwalê hêrişanê top û bombevornayişan xêlê cayan de ves vejya û bi hektarî birrî veşîyay, bî wel. Welatijê ke warewanî kenê kî benê mexdûr.
DÎHABER / DERSIM