Festîvala Tebîet û Kulturî ya Muzirî emser do reya 18. mabênê 26 û 29ê Temmuze de bêro viraştene. Festîvale do bi siloganê ‘Ma bi coşê Muzirî erdanê azadîye û têkoşînî de yenî têhet’ yena viraştene û festîvale do bi rayberîya xeylê dezgeyan bêro viraştene. Seba festîvale muracatê Walîtîya Dêrsimî zî ameye kerdene û heto bîn de xebatê amadekarîye zî dewam kenî. Sey her serre emser zî yeno pawitene ke beşdarbîyayîşêko gird bibo. Çarçewaya festîvale de do merkezê bawerîye bêrî zîyaret kerdene, panelî bêrî viraştene û şîîre û konserî bêrî dayene. Serekê Komîteya Amadekarîye ya Festîvale Alî Haydar Benî derheqê festîvale de melumatî dayî. Benî va ‘festîvale vera vengkerdişê dewe û polîtîkayanê bêmerdimîye de yena viraştene’ û wina domnaye: “Festîvale vera bawerî, kultur, tebîet û bêmerdimîye de nuqtayêka muhîme de ya.” Benî va ‘festîvale ge-ge ameye qedexe kerdene’ û wina domnaye: “Labelê reyna zî na festîvale ameye viraştene. Şarê Dêrsimî qedexeyan nêşinasna û festîvala xo viraşte. Bi deshezaran merdimî herikîyayî Dêrsim û wayîrê kultur û tebîetê xo vejîyayî. Ma bawer kenî ke do emser zî wina bibo. Ma do 4 rojan merkez û qezayanê Dêrsimî de festîvala xo organîze bikerî. Wa herkes wayîrê kultur û tebîetê xo bivejîyo û beşdarê festîvale bibî.” n MA/DÊRSIM