Meclîsê Ciwanan ê Dêrsimî yê Partîya Şaran a Demokratîke (HDP), awanbîyayîşê xo îlan kerd. Pîya bi parlamentera Amedî Semra Guzele û xeylî ciwanî tewrê eşkerayîya ke banê bajarê Dêrsimî yê HDPyî de ameye dayene bîyî. Îlankerdişê meclîsî dimayê rêzgirewtişî ame girewtene.
Ciwanan ra Dîlara Arase qiseykerdişê xo de dîyar kerd ke înan sey Meclîsê Ciwanan ê HDPyî seba vernîgirewtişê rijnayîşê Heskîfî çalakîyêk viraşta û wina domnaye: “Ciwanî halkerdişê problemanê cimatkîyan de wayîrê rolêkê serkêşî yê, labelê ciwanî ewro cimatî ra ameyê visnayene. Bi ajankerdiş, tiryak û erjan ra dûrîvistiş kenê ke ciwanan mesuldarîya cimatkîye ra dûrî bifînê. Ma sey ciwanan soz danê ke ma do vera her tewir polîtîkayanê qirkerdişê kulturkî, zihnîyetê pederşahîye, talankerdişê ekolojîkî û kiştişan de vinderê.”
Semra Guzela HDPyije zî îlanbîyayîşê Meclîsê Ciwanan pîroz kerd. Guzele va ‘ciwanî serkêşê cimatî yê’ û wina dewam kerde: “Her çende polîtîkayê asîmîlasyon û qirkerdişî dewam bikerê zî ciwanîyêka ke xover dana esta. Partîyêk ke ruhê aye yê têkoşînî ciwan o, esta. Têkoşînê ma yo ke cigêrayîşê heqîqete de yo çi rey do nêqedîyo.” Dima ra sînevîzyonêk ke qalê Qirkerdişê Dêrsimî yê 1937-1938î kerdêne, ame ramotene.
PÎRHA / DÊRSIM