Nîjadperwer û qûwetê dewleta tirkî hedefgirotiş û qetilerdişê kurdan rê dewam kenê. Tewr peynî de kî cenîya 71 serrîne Nacîye Ozdemîr zerrê sûke de bi wesayitê zirxî hetê polîsan amê kişten. Ozdemîr vizêr dewa xo de defin bî. Bi desan welatijan qetilkerdena Ozdemîr sûk de protesto kerdî.
Sebebê lînçkerdiş û kiştişî kî kêfî yê. Ge ge seba ke bi zonê xo kurdî qisey kerdî, ya kî bi zonê xo muzîk goşdarî kerdî benê hedef. Nimûneyê nayê peynî kî verîya hefteyekê Stenbol ra ame. Gurekarê înşaatê teyaregeha 3. yê Stenbolî Mehmet Aytaç rîwalo kurdbîyena xo ame qetilkerden. Nîjadperweranê tirk bi 6 lître benzînî ey da ver adir û veşna. Xêlê sûkanê cîya cîyayan de kurdî rîwalo ke kurdî qisey kerdî raştê hêrişan amey û lînç bî.
36 rozan de 3 sivîlî kişîyay
Teyna nîjadperwerê xo nê, polîs û tîmê teybet yê ke quwet danê înan kî bi behaneyanê kêfî kurdan kenê hedef. Teyna Dersîm de mavênê 36 rozan de hîre sîvîlî riyê hêrîşanê dewlete ra weşiya xo kerdê vîndî. Tewr peynî de kî cenîya 71 serrîne Nacîye Ozdemîr zerrê sûke de bi wesayitê zirxî hetê polîsan amê kişten. Welatizî ke verra nayê hersê xo damûsnay ê kî rastê hêrîşê polîsan ameyî.
Dersim de de 1ê Tebaxe de Mesût Îlkbahar o 22 serrîn demo ke piyê xo serva îmze estene berdene qereqolê Pakîre yê Xozat bi guleyanê eskeranê tirk amebi qetil kerdene. Qûwetê dewlete her tim hêrîşanê xo rê ke jû mane vînene. Qetilkerdena Mesût Îlkbahar de kî eskeran îfade xo de ardê zone ke gerre wesayitê bombebarkerdî gurete û fermanê gule rijnayene wesayit amo dayene. Onca eskeran îfadê xo de nêarde zon ke kamî na ferman dayo înan. Dawa qetilkerdena Îlkbahar sero kî qerarê nimitişî amo guretene. Hona jû game rayî ke nêceriya.
Gurekaran rusnay cayê operasyon
Qetilkerdena dewlete bi Îlkbaharî ra bi sînor nêmend. Dola Mûnzûr de kî 9'ê Tebaxe de bombevaranê arteşa tirk est bî. Roza bînî raya Pûlûr bi mane operasyona guretiye. Gurekarê Telekom kî bi mana xetî nêguretene bi zora berdiyayî herema operasyon. Rixmo ke karkeran vatî 'Operasyon esto, bombevaran beno, nêsome' kî, midur û eskerî bi zora karkeran rûsnayî herema operasyonî. Herema operasyonî de ser raya Pûlûr de karkeran ra Şukru Abay bi jû guleyî weşiya xo kerd vîndî. HPG û HBDH eskerakerdisanê nuşteyî de ardê zon ke bi na biyayişî eleqeyê înan çîno. Na dawa sero kî qeyta jû game nêama estene.
Hêrsê Dersimijan kirêşîya kuçeyan
Vîjer nê perey kî zerrê sûke de wesayitê polîsan meydana Sey Riza de gina cenika kokimê Nacîye Ozdemîr a 71 serrîn û qetil kerd. Na biyayis sero sawcî nêame cayê biyayis kî. Şaro ke verra zorvajiya qûwetanê dewlete vejiyayî rastê herîş amey.
Vizêr Dersim de esnafan kepeng guret û kiştişê Ozdemîr protesto kerd. Sûk de herzewbîn nûmayişê protestoyî virazîya. Dersimijê ke Kuçeyê Sanatî de amey têlewe bi panqarta “Mesût Îlkbahar, Şukru Abay, Nacîye Ozdemîr qetil bî. Kiştoxî dhe hesab bidê“ heta cayo ke Ozdemîr amê kişten rayşî. Hemseroka DBP yê sûk Hulya Yer nûmayiş de qisey kerd û vist vîrî ke bîyayiş qeza nê, netîceyê konseptê herbî yê seray de bîya. Yer aşkere kerd ke qetilkerdişê Ozdemîr cînayet o û da zonayen ke 36 rojan de 3 sivîlî amey kişten. Yer va, na sîstem her roj jû maya ma, cenîya ma, însananê sivîl yê ma qetil kena.
Dewa xo de defin bî
Badê damûstayîn şêlig seba merasîma cenaze şî qezaya Mêzgir . Cenazeya Ozdemîr ke badê otopsî peyser perdîya dewa Mastan hetê konvoya wesayîtan amê pêşwazîkerden. Cenaz mezelxaneyê dewe de defin bî. Hemşaredara sûk Nûrhayat Altûn ra pîya hemşaredarê qeza kî tewrê merasîma cenaze bî. Hemserokê DBP yê sûk Mûrat Polatî merasîm de qisey kerd û va waya ma ya Nacîye jû cînayetî rê qurban şî. Welatijan bi sloganan vera qetilkerdişê Ozdemîr nêrazîbîyenê xo damûsnay.
DÎHA/DERSIM