Çend rojî verê Meclîsê Şaredarîya Dêrsimî kombîyayîş de qerarê nameyê ‘Dêrsim’î girewtbi û amebî dîyarkerdene ke ê do nameyê Dêrsimî bidî şaredarîye. Mehkema qeraro ke Meclîsê Şaredarîya Dêrsimî seba nameyê Dêrsimî dabi, bi îtîrazê walîtîye bicaardişê qerarî vindarnabi.
Vera nê de qezaya “Bahşîlî” ya Kirikkale seba ke mîyanê şarî de sey “Bahşili” yena telafuzkerdene sey “Bahşili” amebi vurnayene. Hetkarê Hemserekê Pêroyî yê HDP û Parlamenterê Dêrsimî Alîcan Onluyî derheqê meseleyê qebulkerdişê waştişê şarê Kirikkale yê vurnayîşê nameyî de û astengkerdişê nameyê Dêrsimî de qisey kerd.
Onluyî va ‘Tirkîya û Kurdistan de huqûqêko dihet esto’ û wina domna: “Eke kes hîna rast biname bikero bêhuqûqî esta. Ma nêvanê ke rojawanê Tirkîya de huqûq tam yeno bicaardene. Ancax Kurdistan de çîyo ke yeno bicaardene, huqûqê dişmenîye yo. Tirkîya de vera Kurdan û Elewîyan de huqûqê dişmenîye yeno bicaardene. Kirikkale de nameyo ke mîyanê şarî de yeno şuxulnayene yeno qebulkerdene, la nameyê Dêrsimî yo ke hetê şarî ra yeno şuxulnayene sey suc yeno qebulkerdene. Ma nêeşkenê nê distandardîye qebûl bikerê.”
Onluyî bale ant qerarê şarî ser û wina va: “Dêrsim de şar tekperestîye qebul nêkeno, wazeno ke ziwan û kulturê xo bido ciwîyayene. Şarê Dêrsimî vano ‘ez wazena bi kamîya xo ya tarîxîye biciwîyî’. Ganî meseleyê tabelaya ke şaredarîye de ameya aliqnayene, destê dadgerîya ke bîya Komîsyonê Huqûqî yê AKPyî de nêro veradayene. Na tena tabelayêk nêya, na kamîya ê şarê ûca ya. Ganî Meclîsê Şaredarîye peyê qerarê xo de vindero. Ganî kerdişê xo de biisrar bo û bi paştdayîşê şarî têkoşînî aver bero.”
MA / ANQARA