Dersim de roja Îne qûwetanê dewlet eştî taxanê Sihenk, Mogultay, dewa Ox yê girêdayê merkez, Mezrik a Çîçeklî û qezaya Xozat ser. Netîceyê nê operasyonanê qirkerdinê siyasî de 11 kesî amey binçimkerdin. 8 Kesê ke sewqê mahkeme bî, bi îdiayê ‘azabiyena rêxistin’ tepişiyay. 11 Kesan ra Îlker Çiglik û Hasan Karabûlût badê îfade û Aydin Ozhan kî bi şertê ‘qontrolê edlî’ serbest viradiyay. La 8 kesê bi nameyê Alî Emîr, Tûran Yap, Mûrat Dîrîk, Aydin Ozan, Bariş Dîzdar, Erkan Çelîk, Pakî Bozkûrt û Mehmet Kaçmaz tepişiyay û rûsniyay girotxane.
Çewlig de 4 kes tepişiyay
Qezaya Çewlig Azarpêrt de zî 31ê Çile de qûwetanê dewlet eştî keyeyanê îdarekaranê HDP û DBP ser. Netîce de Hemserokê HDP yê Azarpêrt Saît Guvenç, îdarekarê HDP Tûncay Dîrek û Hemserokê DBP yê qeza Yilmaz Dîrek amey binçimkerdin. Hîrê siyasetmedarî badê girotişê îfadeyan sewqê adliyeya Gêxî bî. Siyasetmedarê ke vejyay verniya mahkeme, netîceyê îfadeyanê şahidanê nimite û bi îdiayê ‘azabiyena rêxistin’ tepişiyay.
Eynî roj mixtarê dewa Pinarbey yê qezaya Çermê Daîmî Bakar û welatijê bi nameyê Mesût Kaya zî amey binçim giroten. Netîceyê mahkeme de, Mixtarê dew Daîmî Bakar serbest ame viradayen, la derheqê Mesût Kaya de zî netîceyê îfadeyanê şahidanê nimite û bi îdiayê ‘azabiyena rêxistin’ qerarê giroten ame dayen. Kaya ruşiya girotxaneyê Çewlig.
DÎHA/DERSIM/ÇEWLIG