Kampanya paştdayena Cizîr û Sûr ramena. Sazgehê ke na kampanya day destcikerdin vengê wayirvejyayişê kampanya day.
Quwetê dewleta tirk, bi fermanê hikûmeta AKP çend aşmiyo sûkanê kurdan hedef gênê. Cayanê zey Cizîr, Sîlopî, Sûr, Nisêbîn de him welatijî hedef yenê giroten, him zî keyeyê ci. Nika welatijî hewl danê ke keye û sûkê xo newede ra înşa bikerê. Serva nay kampanyayê paştdayen amey destpa kerdiş.
Dest bide Cizîr
Cizîra Botan a ke serranê 90î ra na het hedefê teror û zorvajiya dewleta tirk de ya, ti wext dûştê nê êrişan de çokê xo nêwedarna, teslîmê dewlet nêbî. 25 serran ra tepya Cizîr nê rojan de zî reyna îmtihanî ra vêrena ra. Dewleta tirk ke bi aşman nêşa Cizîrijan teslîm bigîro, bodriman de ganî bi ganî însanan da ver adir û veşna. Cizîra ke veriya nê kerdenanê faşîzm de bi aşman xover da, nika hewl dana sûka xo newede ra înşa bikero. Xêlê sûkan ra zî welatijî serva înşayê Cizîr şî qeza û kampanyeyan ramenê. Cenî zî serkeşiya nê kampanyeyan kenê.
Kobanê ra xirabeyo
Ceniya bi nameyê Ozlem Bayraktûtan ke Stenbol ra şî Cizîr aşkere kerd ke hewcedariyê kesê ke Cizîr de zerrî ra bigurweyê esto. Bayraktûtan ard ziwan ke, qeza pêrokîn welişya yo û aşkere kerd ke hewcedariyê her çî esto û wina va: “Ez şîbiya Kobanê zî. La Cizîr de rewş hewna jêde xirabeyo. Senî ke o wext herkes serva Kobanê seferber bi, ganî nika serva Cizîr seferber bibeyno.
Aktivîsta ‘Serva Haştî Hewildayenê Ceniyan’ Ferîde Eralp zî serva paştdayen şî Ciczîr. Eralp da zonayen ke, badê ‘qedexe’ a bi jû qefleyê ceniyan şî Cizîr û wina va: “Nika wezîfeyê ma ameyişê Cizîr, û serva înşayê Cizîr rol girewtiş o”. Eralp va, ma pêrokînî dûştê herbî yê, dûştê na wehşetî yê û aşkere kerd ke, ganî herkes bibo leteyê paştdayenê Cizîr.
Serva newede ra înşayê Cizîr û Sûr jû kampanya zî Stenbol de hetê Komela Paşdayenê Rojawa ra amê destpa kerdin. Na komel heta nika Stenbol ra serva Nisêbîn, Cizîr û Sûr 13 TIR malzeme ruşnay û gureyînî hewna zî ramenê.
Cizîr ra bibime wa û bira
Azaya komelî Neslîhan Guner da zonayen ke nika hewcedariyê gida, betaniye, doşek, dolabêcemed û makîneya kincan (çinayan) esto. Guner da zonayen ke, ê hewcedariyan bi raya komeleyan, Komeleya Sarmaşik û şaredaran tespît kenê. Guner da zonayen ke, Cizîr de rojace des hezar kesî ra şamî pewjiyena û vist vîrî ke serva werdiş, şamî ê malzeme rişenê. Azaya komela paştdayenê Rojawa ard ziwan ke Cizîr de jû roj de şeş hezar nan yeno vila kerdin û vist vîrî ke, ê her keyeyî rê ardî kenê vila.
Azaya Komela Paşdayenê Rojawa Neslîhan Guner, derheqê kampanyeya serva Cizîr de zonayişî day û wina va: “Serva hewcedariyanê jû serr yê jû-di malbatî hewcedariyê malbatanê yardimkar esto. Ganî malbatanê ke yardim hewcedar kenê rê paşt bîro dayen. Senî ke Kobanê newede ra ame înşakerdin, ganî Sûr û Cizîr zî bi o rihî bîro înşa kerdin. Rihê Şengal û Kobanê na qorî zî biresnime Cizîr û Sûr.
Alewiyan ra ‘Loqmeya Xizirî’
Komeleya Alewî yê Demokratîk (DAD) zî serva paştdayen kampanya da destcikerdin. Serokê Şûbeyê DAD yê Stenbol Bulent Felekoglû da zonayen ke heta nika jû TIR yardim rişiya. Felekoglû da zonayen ke hedefê înan bi perspektîfê ‘Hewldayenê Loqmeyê Xizirî’ vilakerdişê kampanya yo û vist vîrî ke plan kenê ke ‘Aşmasûra Alewî’ ronê.
Serokê DÎAYDER yê Stenbol Ekrem Baran’î zî da zonayen ke Sûr û Cizîr de qûwetanê dewlet bi wehşîyane êrişê şarî kerdî. Baran’î vist vîrî ke serva arekerdişê gida, betaniye, hewcedariyanê doman û ceniyan gureyînan ramenê. Ekrem Baran’î aşkere kerd ke, serva dermankerdişê dirbetinanê kesê mexdûr, ganî bi felsefeyê paştdayenê sosyal bîro hereket kerdin.
Hesabê banqa ke hetê Komeleya Paştdayenê Rojawa akerdî wina yê:
İş Bankası Diyarbakır Ofis Şubesi:
TL IBAN:
Tr 960006400000183030893306
USD IBAN:
Tr 030006400000283030212885
EUR IBAN:
Tr 130006400000283030212885
Ziraat Bankası Diyarbakır Ofis
Şubesi: TL IBAN:
Tr 730001001150704108985001
USD IBAN:
Tr 460001001150704108985002
EUR IBAN:
Tr 1900010011500704108985003
Azayanê Komeleya paştdayenê Rojawa ke Cizîr de gureyînan ramenê, aşkere kerdî ke stoqê gidayê wişk kêm benê û vengê paştdayenê kampanya day.
NAVENDÊ XEBERAN