15ê Êlon 2014î de çeteyanê DAİŞ 3 hetî ra êrişê Kobanê kerdî. Bi aşman pirodayişî dewam kerdî û 26ê Çile 2015î de Kobanê çeteyan ra xelesiya. 

Ewro 1. serragêra xelesnayişê Kobanê ya. Qûwetê YPG û YPJ çihar aşmî vera tanq, top û pêrokîn êrişanê çeteyanê DAIŞ xover da. Netîceyê xelesnayişê Kobanê de, Kurdistan de mîladê do newî destpa kerd. Lejwanê YPG Berxwedan Kobanê ke, xoverdayişê Kobanê de aktîf ca girot, serragêra serkewtişê Kobanê de DÎHA rê qisey kerd. 


’Sûka xeyalet’ ra hetê serkewtiş

Berxwedan Kobanê, rexmo ke wextê herbê Kobanê de çihar reynî bi dirbetin, la fina-onca zî imbazanê xo tenya nêvirada. Kobanê tewr peynî de operasyonê xelesnayişê Teşrîn de qora pancîn bi dirbetin.  Berxwedan Kobanê diyar kerd ke, lejkerdişê dayikan, kal û pîran ser ma de zaf tesîr kerd, wijdanê ma bi dirbetin û wina va: “Ma fehm kerd ke, êrişî serva werte ra wedarnayişê Kobanê viraziyenê û vera azadiya şarê Kurd benê. Berxwedan, o ke roja 10. de resya xoverdayişê Kobanê, û Kobanê zey ‘sûka xeyalet’ biname keno, bi nê vatenan behsa sûk keno: “Bado ke ma resyay Kobanê, ma ebi imbazan are bî. Dişmen serva ke kêberê sînor bigîro pêrokîn qûwetê xo û tifingê giran vist dewre. Vera nê tifinganê giran, ma zî bi bisivîng herb kerd. Doçka û cepxaneyê ma tayn bi. 


Alwozî bi rihê fedaî day xover

Kobanê aşkere kerd ke, teyareyanê koalîsyon zaf herey day piro û hayr ant qewimyayişanê o çaxî ser: “Peycoy qûwetê teqwiye yê ma amey. Alwozê ma, vera tifinganê giran û êrişanê wehşî bi rihê fedaî yê Apoyî xover day. No rihî virada ke qûwetê koalîsyonî pirodê. Çike nê qûwetan dî ke Kobanê do nêkewo. Nayî ra, rîwalo ke sola înan zî bibo, destpa bombevornayen kerdî. Çike koalîsyonî dî de, alwozê ma xo erzenê ver tanqan û bi fedaîyane xoverdanê.  


’Nê qûwetî nêşibenê yê bînan’

Berxwedan Kobanê vist vîrî ke, çeteyan bêexlaqî de sînoran nêsilasna, nayî ra tehamilê ma êsir kewtişê destê înan çinêbi. Kobanê ard ziwan ke, çiyê ke Kobanê û Şengal de bî şahid, înan rê bi ders û wina dewam kerd: “Kobanê de ma verikîn şarî girot bin gerantî û rişt bakûrê Kurdistan. Wextê êrişê Girê Miştenûr de, çeteyan telsizan ra wina vatî; ‘ma dê pirodê, biperçiqnê û ravêrê’. Bado ke ma çormeyê înan mehleya Soqulhalê de girot, vatî ‘nê qûwetî nêşibenê yê bînan, nêşibenê qûwetanê Mûsil û rejîmê Baas. Nê cayanê xo nêviradanê, heta guleyê xo yê peynî herb kenê’. 


Xosereya Demokratîk hedef girotî

Lejwanê YPG Berxwedan Kobanê vist vîrî ke, meqsedê êrişan tenya ganîmet girotiş nêbi û va, ‘nê êrişî vera azadiya şarê Kurd, vera felsefeyê ‘Xoseriya Demokratîk yê rayver Apo viraziyay. Kobanê aşkere kerd ke, xeylê alwozê înan zanay ke ê dê şehît bikewê, la rexmê nay şî cepheyê vernî û herb kerdî û şehît kewtî. Kobanê vist vîrî ke, o wextê xoverdayiş de, panc reynî bi dirbetin û her qorî de ser payan de tedavî vîna û fina şi cepheyê herbî û wina va: “Pêrokîn imbazî niya bî. Xoverdayişê Kobanê yeno no mane ke, ‘ti çend finî dirbetin zî biba, tenya nêviradayişê imbazanê xo yo. 

Berxwedan’î da zonayene ke, tewr peynî de, o hamleya QSD yê başûrê Kobanê de biyo dirbetin û wina va: “Ma zana ke ewja de mayinî estê. La mi endî nêwaşt şehîdkewtişê imbazanê bîn bivîna. Berxwedan Kobanê aşkere kerd ke, bado ke çeteyî sûk ra amey pakkerdin û ala YPG/J roniya, înan nefes girot û peynî de ano ziwan ke, imbazê ey yê ke şehîd kewtî zaf kewtê vîra ci.    


ERDOGAN ALTAN