Destana ke Gever ra ver bi Cizîrî derge bena

Fermandar Şevger Gevero ke hîna emrê xo yo şenik de hepisxaneyan de raştê îşkenceyî ame û dima ra vera xo da koyanê Kurdistanî, koyê Cûdî yê Botanî, Rojawan û tewr peynî zî Cizîr de têkoşînê azadî de rolêko aktîf girewt

Şevger Gever (Erhan Aşkan) serra 1992 de dormeyê Gola Wanî de ameyo dinya. Şevger keyeyo ke 6 ferdan ra pê yeno de beno pîl. Keyeyê Aşkanî seba ke wayîrê hîsê welatperwerî yî, zaf reyan raştê zext û tedayê dewlete yenî û dima ra mecbûr manenî ke Wanî ra koçê Geverî bikerî. Şevgero ke bi awe û herra herêma Serhedî bîbî pîl, Gever ra kewt rayîr ver bi Rojawanî şî û dima ra Kobanê ra ame Cizîr û Cizîr de resa şehadet.

Şevger bi şexsîyetê xo yo qerardar mîyanê embazanê xo de rew yeno ferqkerdiş û embazê ci ey ra zaf hes kenî. Şevger 2014 de keweno pêrodayîşêk û netîceyê pêrodayîşî de birîndar beno. Birînê ci senî ke weş benî, o cayêko mendo ra dewam keno. Şevger êdî têkoşînê azadî de reseno dûştê fermandarî. Seba eşqê Botanî zerrîya ci de estbî, tim wazeno vera xo bido Botan. Serkewtişê ci ser o zaf yeno qiseykerdiş. Dima ra vera xo dano Rojawanî û Xoverdayîşê Kobanê de ca gêno. Bi aşman bi hawayo bêters Kobanê de vera çeteyanê DAIŞî de şer keno. Pêrodayîşêk de birîndar beno û senî ke birînê ci baş benî, reyna vera xo dano Botan.”

Pîya şer kenî 

Wexto ke Şevger agêreno Botan, Cizîr de Xoserîya Demokratîke amebî îlankerdiş. Vera hêrişanê dewleta tirk de bi torinanê Şêx Seîd û Mîr Bedirxanî mil bi mil şer keno. Cizîro ke dewlete heme îmkananê xo seferber kerdbî de, Şevger û embazê ci heta peynî şer kenî. Seba ke Şevger şarê Cizîrî ser de tesîrêko gird viraştbî, hêzê JOH û POHî yê dewlete bi hawayo wehşîyane hêrişê şarî kenî. Şevger tîya de birîndar beno. La her çiqas ke birîndar beno zî embazanê xo yê cêrzemînan de tena nêverdano. Wexto ke hêzê dewlete cêrzemînan veşnenî, Şevger vano ‘ya ma heme tîya ra vejîyenî, yan zî ez şima nêverdana’ û heta guleyê xo yo peyên şer keno û peynî de sey Mehmet Tunçan reseno şehadet. Cenazeya Şevgerî Gever de yeno definkerdiş.

Şevger kesêko zaf hesas bî 

Waya Şevgerî va ‘Şevger mîyanê ma de domano ke tewr biaqil bî’ û qiseykerdişê xo wina domnaye: “Wexto ke ma Wan ra ameyî û Gever de bica bîyî, Şevger zî pîyê ma reyde xebetîyayêne û debara keyeyî de para ci zî estbî. Seba ke keyeyê ma welatperwer bî û şarê Geverî zî meymandar bî ma zaf rehet kerd. Labelê na rehetîya ma zaf nêdomîyaye. Şevger hîna 15 serreyîya xo de ame tewqîfkerdiş û wextê tepiştişî de raştê îşkenceyê polîsan ame. Şevgerî tim sîstemî rexne kerdêne. Dima ra Şevger reyêka bîne ame tepiştiş û 4 rojan tepişte mend.  Wexto ke ame veradayîş, beşdarê gerîla bî.”